Ўзбекистонликларнинг инфляцион кутилмалари кузатувлар давридаги минимумни яна бир бор янгилади. Бу ҳақда Марказий банк хабар берди.
Август ойидаги сўров натижаларига кўра, келгуси 12 ойдаги нархлар ўсишининг ўртача прогнози 9,8% ни ташкил этди — бу июнь ва июль ойларига нисбатан 0,3% га кам. Медиан кўрсаткич бир ой олдинги сакрашдан сўнг яна 8% га қайтди.
Ҳудудлар орасида кутилаётган инфляциянинг энг юқори кўрсаткичи Фарғона вилоятида (11,7%) қайд этилди, ундан кейинги ўринларда Тошкент шаҳри (11,4%) ва Сурхондарё вилояти (10,9%) бормоқда. Энг паст кўрсаткичлар Жиззах (8,1%), Хоразм (8,4%), Навоий ва Бухорода (8,6 фоиздан) қайд этилди.
Касблар кесимида IT соҳаси вакиллари энг юқори прогнозларни берди — 11,4%, шунингдек, хизмат кўрсатиш (11,1%) ва транспорт (10,9%) соҳаларида ҳам баҳолар ўртача кўрсаткичдан сезиларли даражада юқори бўлди. Энг оптимистик прогнозлар қишлоқ хўжалиги ходимлари ва талабалар (8,7%) орасида қайд этилди.
Ойига 30 млн сўм ва ундан юқори даромадга эга фуқаролар яна нархлар ўсиши бўйича энг юқори прогнозларни қайд этишди — ўртача 15,8%. Иккинчи ўринни 15−20 млн сўм даромадли гуруҳ (12,4%) эгаллади, 7−15 млн ва 20−30 млн сўм даромадли гуруҳларда эса баҳолар 10,5−11% атрофида бўлди.
Энг паст инфляцион кутилмалар 2 млн сўмгача (7,9%), шунингдек, 2−4 млн сўм (9%) даромад эгаларида кузатилди.
Нархлар прогнозига таъсир қилувчи омиллар орасида энг кўп уй-жой коммунал хизматлари тарифлари ва энергия ресурслари харажатларининг ошиши қайд этилди (мос равишда 53% ва 52% респондентлар томонидан). Шу билан бирга, иккала кўрсаткич ҳам июль ойига нисбатан бироз пасайган.
Учинчи ўринни катта фарқ билан транспорт харажатлари эгаллади — 32%. Иш ҳақи ва нафақалар ўсишини қайд этган фуқаролар улуши бироз ошди (28%), валюта курсининг тебранишлари эса сўровда қатнашганларнинг 14% и билан охирги ўринда қолмоқда.
Тадбиркорлик муҳитида ҳам инфляцион прогнозлар пасайишда давом этмоқда. Ўртача кўрсаткич маълумотлар эълон қилина бошлаганидан бери энг паст даражага тушди — 9,6%, бу июль ойидаги даражадан 0,2% бандга ва июнь ойидагидан 0,3% бандга паст.
Медиан баҳолаш аҳоли ўртасидаги рақамларга ўхшаш динамикани кўрсатди, у июль ойида кескин ошиб 9% га етган ва бир ойдан сўнг яна 8% га тушган.
Бизнес вакиллари орасидаги инфляция прогнозлари бўйича Қорақалпоғистон 11,5% билан Фарғона вилоятини 0,1% га ортда қолдириб, биринчи ўринга чиқди. Тошкент вилояти 10,3% кўрсаткич билан кучли учликни якунлади (пойтахтда бу кўрсаткич 9,9%). Энг паст баҳолар Навоий (8,3%) ва Наманганда (8,7%) қайд этилди.
Тармоқлар бўйича энг юқори кутилмалар ташиш ва таълим (10,9%) ҳамда қишлоқ хўжалиги (10,6%) соҳаларида кузатилди. Ҳунармандларнинг баҳолари бошқаларга қараганда сезиларли даражада паст бўлди (7%), шунингдек, савдо (8,7%) ва қурилиш (9,2%) соҳаларида ҳам паст прогнозлар қайд этилди.
Энергия ресурслари харажатларининг ошиши прогноз омиллари орасида биринчи ўринга чиқди (55%), ундан кейин уй-жой коммунал хизматлари тарифлари (50%) ва транспорт харажатлари (34%) жой олди. Энг кам солиқ юки ва валюта курсининг тебранишлари қайд этилди — мос равишда 15% ва 14%.
