iPhone 18 Pro туркуми
iPhone 18 Pro ва iPhone 18 Pro Max янги 48 мегапикселли Fusion асосий камераси билан жиҳозланган. Унда iPhone учун илк бор ўзгарувчан диафрагма функцияси пайдо бўлган. Камера олтита лазер билан кесилган парданинг ҳаракати орқали диафрагмани ўзгартиради, фойдаланувчи эса камера иловасида диафрагма, экспозиция, оқ баланс ва бошқа созламаларни қўлда бошқариши мумкин.
Янги моделларда фотосуратнинг асл кўринишини тасдиқлашга мўлжалланган Apple Reference Image функцияси ҳам жорий этилган. iPhone 18 Pro 1 199 доллар, iPhone 18 Pro Max эса 1 299 доллар бўлади. 12 сентябрда олдиндан буюртма қилиш очилади, сотувлар 18 сентябрдан бошланади.
Смартфонлар Apple томонидан ишлаб чиқилган А20 Pro чипида ишлайди. 2 нанометрли технология асосида яратилган чип 6 ядроли процессор, 7 ядроли график процессор ва иккита 16 ядроли Neural Engine’га эга.
Компаниянинг маълум қилишича, янги совитиш тизими туфайли iPhone 18 Pro аввалги авлодга нисбатан 40 фоизгача юқори барқарор ишлаш самарадорлигини таъминлайди. iPhone 18 Pro Max’нинг eSIM-версияси эса 45 соатгача видео кўрсатиши мумкин. Батареяни 50 фоизгача тахминан 15 дақиқада қувватлаш мумкин.
AirPods 5 модели
Apple, шунингдек, AirPods 5 қулоқчинларини тақдим этди. Компания уларни очиқ конструкциядаги фаол шовқинни бекор қилиш функциясига эга энг илғор AirPods модели сифатида тақдим этган. Янги модел ташқи шовқинни AirPods 4 with АNC’га нисбатан 50 фоизгача кўпроқ камайтириши мумкин. Унда овоз сифатини яхшилайдиган янги акустик архитектура, Adaptive EQ, Siri AI ва Apple Intelligence асосидаги Live Translation функцияси мавжуд.
AirPods 5 нинг нархи 129 доллар, симсиз қувватлаш ғилофи билан версияси эса 149 доллар этиб белгиланган. Иккинчи вариантда қулоқчин дастасига суриш орқали овоз баландлигини бошқариш функцияси ва ANC ёқилганида 5 соатгача ишлаш имконияти мавжуд.
Apple Watch Series 12
Ушбу қурилмада эса янги Health Sensing System ва S11 чипи пайдо бўлди. Ақлли соат юрак уришини ҳар беш сонияда ўлчайди, юрак уриши вариабеллигини аввалгидан 24 бараваргача тез-тез қайд этади ва фойдаланувчининг кунлик ҳолатини баҳоловчи Readiness функциясини таклиф қилади. У фойдаланувчига 0 дан 10 гача баҳо бериб, “Recover”, “Pace Yourself”, “Ready” ёки “Go for It” тавсияларидан бирини беради.
Series 12 одатий фойдаланишда 24 соатгача, очиқ ҳаводаги машғулотларда эса 10 соатгача ишлайди. 15 дақиқалик қувватлаш қўшимча 12 соатгача ишлаш имконини беради. Модель 42 ва 46 миллиметр ўлчамларда, алюминий, титан ҳамда янги керамика корпус вариантларида тақдим этилган.
Apple Watch Ultra 4
Бу модел ҳам янги Health Sensing System ва S11 чипига эга бўлиб, юрак уриши ва HRV кўрсаткичларини тез-тез ўлчайди ҳамда Readiness функциясини қўллаб-қувватлайди. Соат одатий фойдаланишда 50 соатгача, кам қувват режимида 84 соатгача ишлаши мумкин. Очиқ ҳаводаги машғулотларни тўлиқ GPS ва юрак уриши маълумотлари билан 25 соатгача, Мах Extended Workout режимида эса 45 соатгача кузатади.
Янги Apple Watch моделлари билан бирга iPhone’даги Health иловаси ҳам қайта ишлаб чиқилди. Унда соғлиқ кўрсаткичларини таҳлил қилувчи Insights ва узоқ муддатли саломатлик ҳолатини кузатувчи Longevity бўлимлари пайдо бўлади. Health Аgе функцияси эса айрим кўрсаткичларни фойдаланувчининг ҳақиқий ёши билан таққослайди.
Apple Watch Series 12 ва Watch Ultra 4 да кейинроқ Audio Intelligence функциялари ҳам пайдо бўлади. Улар муҳим товушларни аниқлаш, суҳбатнинг охирги 15 сониясини матн кўринишида қайта кўриш ва суҳбатлар бўйича қисқа хулоса олиш имконини беради. Янги моделларда Apple Intelligence асосидаги Siri AI ҳам WatchОS 27 орқали ишлайди.
iPhone Duo модели
Apple биринчи букиладиган смартфони — iPhone Duo’ни тақдим этди. Қурилма очилганда 7,6 дюймли ички экранга, ёпилганда эса 5,4 дюймли ташқи дисплейга эга бўлади. iPhone Duo 1 999 доллардан бошланади. Қурилма 256 ГБ, 512 ГБ, 1 ТБ ва 2 ТБ хотира вариантларида чиқарилади. АҚШда уни 24 ой давомида ойига 83,29 доллардан тўлаш имконияти ҳам мавжуд.
iPhone Duo очилганда Apple тарихидаги энг юпқа iPhone бўлади. Ички Super Retina XDR дисплейи iPhone 18 Pro Max экранидан 50 фоиз каттароқ, ташқи экран эса iPhone 18 Pro дисплейининг 90 фоизига тенг. Ҳар иккала экран ProMotion, Always On ва 3000 нитгача ёрқинликни қўллаб-қувватлайди. Қурилма Grade 5 титан корпус, Ceramic Shield ҳимояси ва IP68 даражасидаги сув ҳамда чангдан ҳимояланишга эга.
Смартфон А20 Pro чипи билан жиҳозланган. Янги совитиш тизими туфайли унинг барқарор ишлаш самарадорлиги iPhone 17 Pro’га нисбатан 35 фоизгача юқори бўлиши айтилмоқда. Қурилма иккита батареяга эга бўлиб, ички экранда 31 соатгача, ташқи экранда 44 соатгача видео кўрсатади. Икки экран тенг ишлатилганда бир қувват билан 24 соатгача фойдаланиш мумкин. Батарея 50 фоизгача тахминан 20 дақиқада қувватланади.
