Ўзбекистон Марказий банки мамлакат мустақиллигининг 35 йиллигига бағишланган эсдалик олтин ва кумуш тангалар тўпламини сотувга чиқарди. Бу ҳақда регулятор матбуот хизмати хабар берди.
Учта тангадан иборат коллекция Ўзбекистоннинг миллий давлатчилиги, тарихий мероси, миллий қадриятлари ва замонавий тараққиёт ғояларини ягона бадиий концепцияда акс эттиради. Коллекциядаги ҳар бир танга мустақиллик даврининг муҳим рамзлари ва қадриятларини ўзига хос композиция орқали ифодалайди.
Коллекциянинг биринчи тангасида халқимизнинг озодлиги, миллий ғурури ва мустақил давлатчилиги тимсоли сифатида Мустақиллик монументи тасвирланган. Монумент ортидан таралаётган қуёш нурлари истиқлол берган имкониятлар ва ёруғ келажак рамзи сифатида талқин этилган. Танганинг реверс қисмида Ўзбекистон Республикасининг Давлат байроғи ва унинг қабул қилинган санаси – 1991 йил.
18 ноябрь акс эттирилган. Мазкур бадиий ечим давлат рамзларининг мамлакат ҳаётидаги юксак ўрнини ифодалайди.
Иккинчи танга Ўзбекистоннинг тарихий ва маънавий меросига бағишланган. Унинг аверс қисмида Тошкент шаҳридаги Ислом цивилизацияси маркази тасвирланган. Мазкур меъморий образ мамлакатимизнинг жаҳон илм-фани, маънавияти ва ислом цивилизацияси ривожига қўшган ҳиссасини ифодалайди. Танганинг реверс қисмида Давлат герби ва унинг қабул қилинган санаси – 1992 йил 2 июль акс эттирилган. Композиция давлат суверенитети, миллий бирлик ва мустаҳкам давлатчилик ғояларини мужассам этади.
Коллекциянинг учинчи тангасида “35” рақами асосий композицион элемент сифатида акс эттирилган. Унинг нафис ва замонавий талқини мустақилликнинг бардавомлиги ҳамда тарихий масъулиятнинг янги авлодларга ўтишини ифодалайди. Реверс қисмида Давлат мадҳиясидан олинган “Оламни маҳлиё айлаган диёр!” сатри ва мадҳиянинг қабул қилинган санаси – 1992 йил 10 декабрь акс эттирилган. Дизайнда миллий ўзига хосликни ифодалаш учун дўппи нақшларидан ҳам фойдаланилган.
Эсдалик тангалари 999,9 асилликдаги олтин (Ау) ва кумушдан (Аг) зарб этилган бўлиб, ҳар бир танганинг оғирлиги 31,1 грамм, номинал қиймати эса 100 000 сўмни ташкил этади. Тангалар уч донадан иборат коллекция тўплами кўринишида, шунингдек, коллекциядаги тангалар ҳар бири алоҳида ҳолда сотувга чиқарилади.
Олтин эсдалик тангаларининг дастлабки тиражи 450 дона, кумуш тангаларнинг дастлабки тиражи эса 800 донани ташкил этади. Уларнинг тиражи бозор эҳтиёжидан келиб чиқиб оширилиши мумкин.
Эсдалик тангалари Ўзбекистон мустақиллигининг 35 йиллик тарихини миллий давлатчилик, тарихий хотира ва замонавий тараққиёт ғоялари уйғунлигида акс эттиради. Коллекция миллий тарих ва маданиятга қизиқувчилар, шунингдек, мустақиллик тарихини ўзида мужассам этган ноёб эсдалик буюмларини қадрловчилар учун мўлжалланган.
Эсдалик тангалари 27 августдан бошлаб 690 та тижорат банклари филиалларида сотувга чиқарилади. Сотув нархлари ва банклардаги мавжудлик бўйича янгиланган маʻлумотлар Марказий банкнинг расмий веб-сайти ҳар куни эʻлон қилиб борилади.
