Хитойга газ экспорти 36,2% га камайиб, $279,7 млнни ташкил этди. Июль ойида эса экспорт ҳажми ўтган ойга нисбатан 50% га ошди.
2026 йил январь—июль якунларига кўра, Ўзбекистон экспорт қилганидан анча кўпроқ табиий газ импорт қилди. Бу ҳақда Миллий статистика қўмитаси маълумотларида келтирилган.
Етти ойда Россия ва Туркманистондан табиий газ импорти 8,2 фоизга ошиб, 1,1 млрд долларни ташкил этди. Шундан 105,4 млн долларни суюлтирилган газ (пропан) ҳиссасига тўғри келган. Унинг импорти эса 3,6 баравар ошган.
Январь ойида газ импорти 167,6 млн доллар бўлган. Февралда бу кўрсаткич кескин камайиб, 34,6 млн долларга тушган. Мартда импорт 158,3 млн доллар, апрелда 147,8 млн доллар, майда 216,4 млн доллар, июнда эса йил бошидан бери рекорд даражага чиқиб, 247 млн долларни ташкил этган. Июль ойида импорт ҳажми яна камайиб, 38,3 млн долларга тушган.
Газ экспорти йил бошидан буён 36,2 фоизга камайиб, 279,7 млн долларни ташкил этди. Январь ойида экспорт тўлиқ тўхтатилган ва фақат февралда 7,1 млн доллар билан қайта тикланган.
Март ойида экспорт февралга нисбатан беш баравардан кўпроққа ошиб, 29,4 млн долларга, апрелда яна уч баравар кўпайиб, 92,7 млн долларга етган. Май ойида экспорт ҳажми 73,5 млн долларгача, июнда 30 млн долларгача камайган, июлда эса 46,8 млн долларгача ошган.
Бироқ Миллий статистика қўмитаси маълумотлари Хитой Бош божхона бошқармаси маълумотларидан сезиларли фарқ қилади. Унга кўра, Ўзбекистон январь—июль ойларида Хитойга 258,3 млн долларлик газ экспорт қилган. Икки мамлакат статистикаси ўртасидаги фарқ 21,4 млн доллардан ошади.
Бундан ташқари, Хитой божхонаси Ўзбекистондан табиий газ етказиб бериш сезиларли камайганини маълум қилди. Июль ойида экспорт 79,03 млн долларни ташкил этиб, июнга нисбатан 1,99 баравар, йиллик ҳисобда эса 2,38 баравар камайган. 2025 йил январь июлидаги 463 млн доллар билан солиштирганда, газ экспорти 44 фоиздан кўпроққа қисқарган.
Хитойга газ экспорти бўйича Россия етакчилик қилмоқда — йил бошидан буён 5,49 млр доллардлик газ етказиб берган. Иккинчи ўринда Туркманистон — 4,72 млрд доллар, ундан кейин Мянма — 865,2 млн доллар, Қозоғистон — 565,6 млн ва Ўзбекистон — 258,3 млн доллар турибди.
