Январ-июн ойларида Ўзбекистонга 37 минг 874 та электромобил импорт қилинди. Бу ҳақда Миллий статистика қўмитаси хабар берди. 2025-йилнинг шу даврига нисбатан электромобил импорти 2,6 бараварга ёки 23,5 минг донага ошган.
Таққослаш учун, ўтган йилнинг биринчи ярмида ички ёнув двигателига эга автомобилларни ҳам ҳисобга олганда, жами 24 минг 355 та автомобил импорт қилинган.
Ярим йил давомида олиб кирилган электромобилларнинг умумий қиймати 447,7 млн долларни ташкил этди. Бу 2025-йилнинг шу давридаги жами автомобил импорти қийматидан 25,6 млн долларга кўп.
Электромобилларни Ўзбекистон бозорига етказиб беришда Хитой етакчилик қилмоқда. Йил бошидан буён Хитойдан 37 минг 560 та электромобил олиб кирилган бўлиб, бу умумий импортнинг 99,2 фоизини ташкил этади.
Шунингдек, Гонконгдан 141 та, Жанубий Кореядан 80 та, Германиядан 42 та ва АҚШдан 21 та электромобил импорт қилинган. Қолган давлатлардан жами 30 та электромобил олиб келинган.
Миллий статистика қўмитаси маълумотларига кўра, 1-апрел ҳолатида Ўзбекистонда 109,2 мингта электромобил рўйхатдан ўтган. Бу кўрсаткич бир йил аввалгидан 68 фоизга кўп. Электромобилларнинг 79,85 минги ёки 73 фоизи Тошкент шаҳрига тўғри келади.
Шу билан бирга, ҳудудларда ҳам электромобиллар сони тез ўсмоқда. Самарқанд вилоятида уларнинг сони 2,6 баравар, Хоразмда 2,1 баравар, Сирдарёда эса 98 фоизга ошган.
