Toshkentda hokim qarori bilan avtomobillarni evakuatsiya qilish va ularni jarima maydonchasida saqlash uchun toʻlovning eng yuqori miqdorlari belgilandi.
Hozirda avtomobillarni evakuatsiya qilish xizmatlarini turli xususiy kompaniyalar koʻrsatmoqda. Shu vaqtgacha ushbu xizmatlar uchun tariflar shahar darajasida tartibga solinmagan edi. Iyun oyi boshida poytaxt hokimi Shavkat Umurzakov jurnalistlarga Toshkent uchun 120 ta evakuator xarid qilish va Yoʻl harakati qoidalarini buzgan haydovchilarning avtomobillarini evakuatsiya qilish hamda saqlashning yangi yaxlit tizimini joriy etish rejalari haqida maʼlum qilgan edi.
Toshkent shahrida yoʻl harakatini tashkil etish markazi maʼlum qilishicha, mazkur qaror “yoʻlaklar va piyodalar hududlari odamlar uchun erkin boʻlishi lozim boʻlgan qulay, xavfsiz va tartibli shahar muhitini yaratish boʻyicha olib borilayotgan izchil ishlarning bir qismidir”.
Hujjatga koʻra, maxsus transport vositasida avtomobilni evakuatsiya qilish va tashishning har bir kilometri uchun bazaviy hisoblash miqdorining 20 foizi, avtomobilni saqlash uchun esa har bir sutkaga BHMning 20 foizi miqdorida haq undiriladi.
Bunda avtomobilni jarima maydonchasiga evakuatsiya qilishning umumiy qiymati BHMning 4 baravaridan oshmasligi kerak.
“Yagona cheklangan tariflarning joriy etilishi tizimni yanada tushunarli va shaffof qilishga, fuqarolarni asossiz hisob-kitoblardan himoyalashga va ortiqcha toʻlovlarga yoʻl qoʻymaslikka imkon beradi”, — deyildi YHTEM xabarida.
“Avtomobillar piyodalar yoʻlaklarini, oʻtish joylarini va boshqa jamoat joylarini toʻsib qoʻymasligi lozim. Qulay shahar harakatning barcha ishtirokchilariga oʻzaro hurmatdan boshlanadi. Yoʻlaklar — piyodalarga, yoʻllar — transportga, qoidalar esa barcha uchun yagona va tushunarli boʻlishi shart”, — deya qoʻshimcha qilishdi markazda.
