Oʻzbekiston olti oydan beri xorijga oltin sotmayapti Bu haqda Milliy statistika qoʻmitasi maʼlumotlaridan maʼlum boʻldi.
Yanvar—mart oylarida eksport $5,8 mlrdni tashkil etdi, bu 2025 yilning shu davriga nisbatan 29,3% ga kam. Barcha yetkazib berishlarning qariyb 40%i xizmatlarga ($2,32 mlrd), keyingi oʻrinlarda sanoat tovarlari ($1,03 mlrd) va kimyo mahsulotlari ($613 mln) toʻgʻri keldi.
Oltin eksportining toʻxtatilishi tufayli savdo balansining salbiy saldosi (eksport va import oʻrtasidagi farq) deyarli olti barobarga oshdi — oʻtgan yilgi $1,12 mlrddan $6,4 mlrdgacha.
2026 yil boshidan buyon yuqori jahon narxlariga qaramay (unsiya uchun $4500 dan $5500 gacha boʻlgan oraliqda) oltin eksporti amalga oshirilmadi. Shu tariqa, Oʻzbekiston qimmatbaho metallni ketma-ket oltinchi oy sotmayapti. 2025 yilning birinchi choragida oltin sotuvi $3,57 mlrddan oshgan edi.
Oʻzbekiston soʻnggi marta oʻtgan yilning sentabr oyida $1,47 mlrdga oltin sotgan. 2025 yil yakunlariga koʻra, qimmatbaho metallarni yetkazib berish yangi mutlaq rekord oʻrnatdi va $9,9 mlrddan oshdi.
Navoiy kon-metallurgiya kombinati yanvar mart oylarida 737 ming troya unsiyasi oltin ishlab chiqargan, bu oʻtgan yilgi koʻrsatkichdan 2,19% ga kamdir. Shu bilan birga, ishlab chiqarilgan mahsulotlar qiymati 58,3% ga oʻsib, 44 trln soʻmdan oshgan.
Mart oyida oltin-valyuta zaxiralari hajmi $8 mlrdga kamayib, $68,99 mlrdni tashkil qildi va yil boshidan buyon kuzatilgan deyarli barcha oʻsishni yoʻqqa chiqardi.
Markaziy bank omborlaridagi oltinning qiymati 2023 yil fevralidan beri ilk bor pasayib, $60,85 mlrdga (-10%) tushdi. Ayni paytda, uning fizik hajmi 9,3 tonnaga koʻpayib, 416,76 tonnaga (13,4 mln troya unsiyasi) yetdi.
Soʻnggi olti oy ichida oltinning fizik zaxiralari 1,74 mln troya unsiyaga yoxud 54,1 tonnaga koʻpaygan.
