Raqobat qoʻmitasi yirik savdo tarmoqlari hamda hududlardagi savdo komplekslarini Ramazon oyi arafasida ijtimoiy muhim oziq-ovqat mahsulotlari narxlarining barqarorligini taʼminlash boʻyicha ogohlantirdi. Bu haqda qoʻmita matbuot xizmati xabar berdi.
Maʼlum qilinishicha, Ramazon oyida talab keskin oshishi mumkin boʻlgan mahsulotlar narxlarini nazorat qilish yuzasidan chakana savdo tarmoqlari hamda savdo komplekslariga yetkazib beruvchi korxonalarga tegishli koʻrsatmalar yuborilgan.
Xususan, narxlarni oʻzgartirish, logistika xarajatlari oshishi yoki boshqa omillar sabab narxlar koʻtarilishi ehtimoli yuzaga kelgan taqdirda, bu haqda qoʻmitani tezkor xabardor qilish belgilangan.
Shuningdek, yetkazib beruvchilar tomonidan asossiz narx oshirilishiga yoʻl qoʻymaslik yuzasidan ogohlantirishlar berib borish vazifasi yuklatilgan.
Qoʻmita ijtimoiy muhim oziq-ovqat mahsulotlari narxlari barqarorligini taʼminlash boʻyicha oʻz vakolatlari doirasida zarur choralar koʻrib borilishini taʼkidladi.
13 fevral kuni prezident raisligida oʻtkazilgan yigʻilishda davlat rahbari Ramazon oyida dehqon bozorlari va yirik savdo komplekslarida arzonlashgan oziq-ovqat yarmarkalarini boshlash boʻyicha topshiriq bergandi.
