“Soliqlarning yigʻiluvchanlik darajasini oshirish va faol soliq toʻlovchilarni ragʻbatlantirish chora-tadbirlari toʻgʻrisida”gi prezident qaroriga koʻra, eng yaxshi soliq toʻlovchilarni ragʻbatlantirish maqsadida 2026 yildan “Eng yaxshi soliq toʻlovchi mahalla” nominatsiyasi joriy etiladi.
Bunda gʻoliblarni aniqlash boʻyicha mezonlar quyidagilar:
- har 1 000 nafar aholiga toʻgʻri keladigan kichik biznes soni;
- har 1 000 nafar aholiga toʻgʻri keladigan kichik biznes tomonidan toʻlangan soliqlar miqdori;
- har 1 000 nafar aholiga toʻgʻri keladigan jismoniy shaxslardan olinadigan daromad soligʻi (JSHODS) toʻlovchilar soni;
- har 1 000 nafar aholiga toʻgʻri keladigan oʻzini oʻzi band qilgan fuqarolar soni va ular tomonidan toʻlangan soliqlar miqdori;
- mahalla fuqarolari tomonidan mol-mulk va yer soliqlarining toʻlanganlik darajasi.
Gʻoliblar tashabbusli budjet doirasida ketma-ket 2 marotaba gʻolib deb topilsa, navbatdagi 2 ta mavsum doirasida ularga loyiha kiritish imkoniyatini cheklash qoidasi qoʻllanmaydi.
Loyihalarni sheriklik asosida moliyalashtirishda ushbu mahallalar aholisi tomonidan loyiha qiymatining 25%i moliyalashtirilsa, loyiha gʻolib deb topiladi hamda qolgan 75%i davlat byudjetidan moliyalashtiriladi.
Belgilangan mezonlar asosida har yili birinchi 100 talikka kirgan eng yaxshi soliq toʻlovchi mahallalarning har biriga budjetdan mablagʻ ajratiladi. Bunda 2 mlrd soʻm mablagʻ tegishlicha Mahallaning ijtimoiy-iqtisodiy muammolarini hal etish jamgʻarmasiga yoʻnaltiriladi hamda faqat ushbu mahalla infratuzilmasini yaxshilash uchun foydalaniladi.
