Oʻzbekistonda kelasi yil uchun moʻljallangan davlat byudjeti loyihasiga koʻra, 2026 yil 1 yanvardan koʻchmas mulk va avtotransport vositalarini ijaraga beruvchi jismoniy va yuridik shaxslar uchun ijara toʻlovining eng kam stavkalarini oshirish taklif etilmoqda.
Bunda mol-mulkni ijaraga beruvchi shaxslar uchun soliq solish maqsadida qoʻllanadigan ijara toʻlovining minimal stavkalarini 7 foizga indeksatsiya qilish rejalashtirilgan.
Turar joyni ijaraga berish boʻyicha eng kam stavka quyidagicha belgilanishi kutilmoqda (1 kvadrat metr uchun oyiga):
- Toshkent shahrida — 30 ming soʻm (hozir 28 ming soʻm);
- Nukus shahri va viloyat markazlarida — 14 500 soʻm (hozir 13,5 ming soʻm);
- boshqa aholi punktlarida — 5 900 soʻm (hozir 5,5 ming soʻm).
Noturar joyni ijaraga berish boʻyicha eng kam stavka quyidagicha belgilanishi mumkin (1 kvadrat metr uchun oyiga):
- Toshkent shahrida — 48 ming soʻm (hozir 45 ming soʻm);
- Nukus shahri va viloyat markazlarida — 28 400 soʻm (hozir 26,5 ming soʻm);
- boshqa aholi punktlarida — 11 800 soʻm (hozir 11 ming soʻm).
Yengil avtomobilni ijaraga berishning eng kam stavkasi oyiga 918 mingsoʻm (hozir 858 ming soʻm), mikroavtobus, avtobus va yuk avtomobili uchun 1 mln 824 ming soʻm (1 mln 705 ming soʻm edi) etib belgilash taklif etilgan.
Hujjat loyihasida qayd etilishicha, ushbu stavkalar jismoniy va yuridik shaxslarning mol-mulkni ijaraga berishdan olingan daromadlariga soliq solish maqsadida qoʻllanadi hamda koʻchmas mulkdan tekin foydalanish shartnomalariga (bundan yaqin qarindoshlar oʻrtasidagi tuzilgan shartnomalar mustasno) nisbatan tatbiq etiladi.
