Buxoro neftni qayta ishlash zavodida ishlab chiqarilgan AI-92 rusumli 1 litr benzinning birja savdolaridagi narxi 9400 soʻmgacha arzonlashtirildi, deya xabar berdi “Oʻzbekneftgaz”.
Kompaniya qayd etishicha, birjada benzinning 1 tonnasi boshlangʻich narxi birinchi bosqichda 12 mln 881 ming soʻmdan 12 mln 628 ming soʻmga tushirilgan. Bu 1 litr AI-92 rusumidagi avtobenzinning birjadagi boshlangʻich narxi 9 400 soʻm degani.
“Oʻzbekneftgaz ichki bozorni rivojlantirish va isteʼmolchilar manfaatlarini qoʻllab-quvvatlash maqsadida yuqori oktanli yoqilgʻi narxlarini bosqichma-bosqich pasaytirish ishlarini davom ettiradi”, — deyiladi kompaniya xabarida.
Eslatib oʻtamiz, “Oʻzbekneftgaz” kompaniyasi sentyabr oyidan AI-80 markali benzin ishlab chiqarishdan voz kechishi xabar qilingandi.
Masala tarixi
AI-80 benzinini ishlab chiqarishni toʻxtatish rejalari haqida kamida 2020 yildan beri aytilmoqda, biroq rasmiylar bu vazifani bajarishni doimo kechiktirgan.
2024 yil boshida Energetika vazirligi AI-92 va undan yuqori markali benzin ishlab chiqarishni koʻpaytirish hisobiga 2026 yilgacha AI-80 benzinidan voz kechish rejalari haqida xabar bergan edi. Shu bilan birga, yuqori oktanli benzin markalariga aksiz soligʻi stavkalarini pasaytirish taklif qilindi.
Keyinroq prezident bosh vazirga 2025 yildan boshlab Ai-80 (“Yevro-2” standarti) dan uzil-kesil voz kechish masalasini hal qilishni topshirdi.
Biroq prezidentning sentyabrdagi qarorida 2028 yildan boshlab “Yevro-4” standartidan past boʻlgan motor yoqilgʻisidan foydalanish va sotishni bosqichma-bosqich cheklash toʻgʻrisida soʻz borgandi. Xususan, buning uchun Ai-80 ishlab chiqaruvchi Buxoro va Fargʻona neftni qayta ishlash zavodlari chuqur modernizatsiya qilinadi hamda «Yevro-2» va “Yevro-3” standartlaridagi yoqilgʻini import qilish taqiqlanadi.
“Oʻzbekneftgaz” matbuot xizmati modernizatsiya uchun vaqt kerak boʻlishini taʼkidlagan. “Buxoro neftni qayta ishlash zavodida „Yevro-4“ va undan yuqori benzinga oʻtish uchun vaqt kerak. [2024 yil] oxirigacha loyihaning texnik-iqtisodiy asoslari ishlab chiqiladi, shundan soʻng u Vazirlar Mahkamasiga kiritiladi. Loyihani toʻliq yakunlash uchun 30−32 oy kerak boʻladi”, — deyiladi kompaniya xabarida.
Prezidentning “Oʻzbekiston-2030” strategiyasi doirasida Atrof-muhitni muhofaza qilish va “yashil” iqtisodiyotni rivojlantirish yili (2025 yil) davlat dasturini amalga oshirish toʻgʻrisidagi farmoni bilan 2025 yil oxirigacha Ai-80 benzinidan foydalanish va sotishni cheklash uchun “barcha kuch va resurslarni safarbar qilish” topshirildi.
