Oʻzbekiston Markaziy banki asosiy stavkasini koʻrib chiqish boʻyicha 2025 yil 13 martga belgilangan boshqaruv yigʻilishi sanasini koʻchirish toʻgʻrisida qaror qabul qildi. Bu haqda regulyator matbuot xizmati xabar berdi.
Fevral yakuni boʻyicha mamlakatning asosiy makroiqtisodiy koʻrsatkichlari va savdo hamkorlar iqtisodiyoti boʻyicha maʼlumotlar martning ikkinchi yarmida eʼlon qilinishini hamda ishlab chiqilayotgan makroiqtisodiy tahlil va prognozlarda bu yangilangan koʻrsatkichlar asos boʻlishini inobatga olib yigʻilish 20 martga koʻchirilgan.
Markaziy bank boshqaruvining soʻnggi yigʻilishi 23 yanvarda oʻtkazilgan boʻlib, unda asosiy stavkani yillik 13,5 foiz darajasida saqlab qolish toʻgʻrisida qaror qabul qilingandi. 2024 yilning iyul oyida Markaziy bank inflyatsiya xavfi pasayishi fonida asosiy stavkani yillik 13,5 foizgacha pasaytirishga qaror qilgan. Oʻshanda asosiy stavka yetti yil ichida birinchi marta 14 foizdan pastga tushgandi.
