АҚШ президенти Доналд Трампнинг $Trump мемкоинига сармоя киритган юз минглаб инвесторлар қарийб 2 миллиард доллар йўқотди, деб хабар берди The New York Times газетаси Chainalysis таҳлилий компанияси маълумотларига таяниб.
Унинг ҳисоб-китобларига кўра, мемкоин ишга туширилгандан кейинги дастлабки 19 кун ичида жами 813 294 нафар крипто-ҳамён эгаси зарар кўрган.
NYT’нинг ёзишича, ҳозирги нархидан юқорироқ тўлов қилганлар зарар кўрган. Шундай бўлсада, бу трейдерларнинг аксарияти зарардаги токенларини сақлаб турибди, эҳтимол уларнинг нархи яна кўтарилишига умид қилмоқда.
Chainalysis маълумотларига кўра, асосан мемкоиннинг дастлабки харидорлари фойда кўрган бўлиб, нақд пулга айлантирилган фойданинг умумий миқдори 6,6 миллиард долларни ташкил этган.
Таҳлил компанияси маълумотларига кўра, Трампнинг оиласи ва ҳамкорлари савдо йиғимлари шаклида деярли 100 миллион доллар олган, бироқ бу маблағларнинг аксарияти ҳали нақдлаштирилмаган.
Хабар ёзилаётган пайтда $Trump мемкоини 14,77 доллардан сотилган бўлса, нархнинг энг юқори нуқтасида эса 75 долларга етган эди.
Бу шундай токенлар бозори учун одатий ҳолат: йирик иштирокчилар аввал активга қизиқиш уйғотади, сўнгра қиймат ошиши фонида ўз захираларини сота бошлайди, бу эса нархнинг тушишига олиб келади.
АҚШ Қимматли қоғозлар ва биржалар бўйича комиссиясининг собиқ крипто-маслаҳатчиси Кори Фреер айтишича, Доналд Трамп инвесторларга зарар етказувчи шубҳали крипто-схемаларда қатнашмоқда.
Шу билан бирга, у жабрланувчиларни ҳимоя қилиш чораларини бекор қиладиган, аммо Трамп ва унинг оиласини ҳимоя қиладиган назоратчиларни тайинламоқда.
