Telegram асосчиси Павел Дуров “Hamster Kombat” ўйини тез орада TON блокчейнига токен чиқаришини маълум қилди. Бу ҳақда у ўзининг Telegram каналида ёзди.
Дуровнинг таъкидлашича, “Hamster Kombat” сўнгги пайтларда барча муҳокама қилаётган интернет феноменига айланиб, бор йўғи 3 ой ичида 239 миллион обуначи йиғган. Мини илова 100 миллион обуначига эришиши учун эса 73 кун кифоя қилган. Ҳозирда “Hamster Kombat”да ҳар кун 3-4 миллион янги обуначилар рўйхатдан ўтмоқда.
Дуров, шунингдек, яна бир бор Telegram ва ТОНда бу каби мини иловаларнинг катта тўлқини кутилаётганини маълум қилди. Бундан аввалги шундай ўйинлардан бири Notcoin бир неча ой ичида 35 миллион фаол фойдаланувчиларни йиғган ҳамда 2024-йилнинг 16-май куни TON блокчейнига токен чиқариб, барча криптовалюталарда рўйхатга олинганди. Шундан сўнг, Notcoin савдо ҳажми бўйича дунёнинг топ-10 криптовалюталаридан бирига айланганди. Унинг бозор капиталлашуви эса 700 миллион АҚШ долларига етган.
