Raqobatni rivojlantirish va isteʼmolchilar huquqlarini himoya qilish qoʻmitasi elektrotexnika tovarlari savdosi bilan shugʻullanuvchi Elmakon savdo belgisining reklama kampaniyasi keng jamoatchilik oʻrtasida keng rezonans yuzaga kelganligi munosabati bilan quyidagilarni eʼlon qildi.
Maʼlum qilinishicha, Oʻzbekistonning ayrim hududlarida Elmakon savdo belgisi oʻz xizmatlari uchun “ʻIkkinch xotinʻga gʻamxoʻrlik qiling”, “Mahrga texnika soʻrang” matnli reklama bannerlarini joylashtirgan.
Qoʻmita bayonotida ushbu reklama bannerlari “Reklama toʻgʻrisida”gi qonun talablariga, shuningdek, jamiyatda oʻrnatilgan odob-axloq meʼyorlariga zid, axloqiy va nooʻrin deb hisoblangan.
Shu munosabat bilan Elmakon kompaniyasiga shu kabi mazmundagi reklama bannerlarini olib tashlash topshirilib, ayni paytda barcha reklama bannerlari olib tashlani taʼkidlandi.
“Raqobatni rivojlantirish va isteʼmolchilar huquqlarini himoya qilish qoʻmitasi reklama mazmunini monitoring qilishda davom etadi va reklama beruvchilar tomonidan nomaqbul reklama joylashtirilishining oldini olish choralarini koʻradi”, deyiladi xabarda.
