Qirgʻiziston banklari AQSH tomonidan sanksiyalar tahdidi tufayli Rossiyaning “Mir” toʻlov tizimi bilan ishlashni toʻxtatdi. Bu haqda Qirgʻiziston milliy banki raisi oʻrinbosari Qayip Kulenbekovga tayanib, “24.kg” xabar berdi.
Uning soʻzlariga koʻra, regulyator banklarga “Mir” kartalari bilan ishlash boʻyicha koʻrsatmalar bermagan, ularga xizmat koʻrsatishni rad etish toʻgʻrisidagi qarorni kredit tashkilotlari ikkilamchi sanksiyalardan qoʻrqib, mustaqil ravishda qabul qilgan.
“Agar Qirgʻiziston banklariga ikkinchi darajali sanksiyalar qoʻllanilsa, bu ularning vakillik hisoblariga taʼsir qilishi mumkin. Cheklovlar ularning xorijiy banklardagi vakillik hisoblariga ham tegishli boʻlishi mumkin. Shu munosabat bilan bank faoliyati cheklanishi mumkin”, — deb tushuntirdi Kulenbekov.
Avvalroq, “Kapital Bank” va “Demir Bank” Rossiyaning “Mir” kartalariga xizmat koʻrsatishni toʻxtatgan edi. Sakkizta tijorat banki ham ushbu kartalarga xizmat koʻrsatishni toʻxtatganini eʼlon qilgandi.
