Germaniyaning BMW kompaniyasi Vengriyadagi yangi zavodga sarmoyani 2 milliard yevrogacha oshiradi. Bu haqda Interfax xabar berdi.
Qayd etilishicha, Germaniyaning hashamatli avtomobil ishlab chiqaruvchi BMW Vengriyadagi zavodiga sarmoyasini 2018 yilda eʼlon qilingan 1 milliard yevrodan 2 milliard yevrogacha oshiradi.
Vengriyaning Debretsen zavodi avval eʼlon qilinganidek, nafaqat avtomobillar, balki elektromobillar uchun yuqori voltli akkumulyatorlarni ham ishlab chiqaradi. Zavodning kengayishi avtomobil ishlab chiqarish liniyasida 1000 ta ish oʻrniga qoʻshimcha ravishda 500 dan ortiq yangi ish oʻrni yaratish imkonini beradi.
Zavodning qurilishi taxminan olti oy oldin boshlangan. Avtomobillar va undagi akkumulyatorlarni ishlab chiqarish 2025 yil oxirigacha boshlanishi kutilmoqda.
