Ўзбекистонга 2022 йилнинг ўтган тўққиз ойи мобайнида 51,3 миллион долларлик 1629 та электромобиль импорт қилинди. Автомобилларнинг асосий қисми Хитойдан олиб келинган.
Ўзбекистонликлар 2022 йилнинг тўққиз ойи давомида электромобиль импортига 51,3 миллион доллар сарфлаган. Бу ҳақда Давлат статистика қўмитаси хабар берди.
Маълум қилинишича, 2022 йилнинг январь-сентябрь ойлари давомида мамлакатга 51,3 миллион долларлик 1629 дона электромобиль импорт қилинган. Сентябрь ойида эса чет элдан 130 та электромобиль харид қилинган.
Импорт электромобилларнинг асосий қисми Хитой ҳиссасига тўғри келади — 1422 дона. Шунингдек, Бирлашган Араб Амирликларидан 111 дона, Германиядан 41 дона, Гонконгдан 31 дона, Литвадан 10 дона, Корея Республикасидан 7 дона ва бошқа давлатлардан 7 дона электромобиль олиб келинган.
Аввалроқ Ўзбекистонга электромобиль импорти бир йилда 4,5 бараварга ўсгани хабар берилганди. Шунингдек, 2022 йилнинг дастлабки икки ойида Ўзбекистонга электромобиль импортида етакчилик қилувчи олти давлат эълон қилинганди.
