Shavkat Mirziyoyev 10 oktyabr kuni elektromobil tarmogʻini rivojlantirish va xizmat koʻrsatish qamrovini oshirishga qaratilgan loyihalar taqdimoti bilan tanishdi. Bu haqda Prezident matbuot xizmati xabar berdi.
Taqdimotda elektromobillar ishlab chiqarishni yoʻlga qoʻyish, quvvatlash stansiyalari tarmogʻini kengaytirish, butlovchi qismlarni mahalliylashtirish masalalari muhokama qilindi.
Taʼkidlanishicha, Oʻzbekistonda kelgusi ikki yilda joylarda ikki mingta elektromobillarni quvvatlash stansiyalari tashkil etiladi. Bu stansiyalarga ham yer, mulk va foyda soligʻidan imtiyoz qoʻllaniladi.
Shunindek, tadbirkorlarga quvvatlash stansiyalari orqali elektrni erkin narxda sotish huquqi beriladi. Shu bilan birga, 2023 yilda Toshkentga yana 200 ta, Samarqandga 100 ta elektrobus olib kelish rejalashtirilmoqda.
