Quvaytda XZERO nomli ekologik toza va butunlay piyodalar uchun moʻljallangan megapolisni yaratish rejalashtirilmoqda. Bu haqda “Daily Mail” xabar berdi.
Taʼkidlanishicha, megapolis URB arxitektura kompaniyasi tomonidan quriladi. Uning mutaxassislari loyihaning asosi sifatida ekologik toza yondashuvmi asos qilib olgan. Mazkur megapolisda yashivchi aholi faqat piyoda, velosipedda yoki elektr aravachalar yordamida harakatlana oladi. Bundan tashqari, ifloslangan suvlar qayta ishlanadi.
“Shahar kelajak avlodlar uchun atrof-muhitni muhofaza qilish bilan birga eng yuqori hayot sifatini taʼminlaydi. Atrof-muhitga eng kam taʼsir koʻrsatadigan eng yuqori turmush standartlariga rioya qilgan holda bunday barqaror aholi punktlarini yaratish endi tanlov emas – bu zaruratga aylandi”, — deydi loyihalashtiruvchi kompaniya direktori.
Loyihaga koʻra, megapolis ulkan gul koʻrinishida qad rostlaydi. Markazda suv havzalari boʻlgan dam olish zonasi quriladi — undan taʼlim, koʻngilochar yoki tibbiy maqsadlar uchun moʻljallangan klasterlar ajralib chiqadi.
Shuningdek, shahar hududining 65 foizdan ortigʻi qishloq xoʻjaligi landshaftlari, yoʻlaklar, sport maydonchalari va hovlilar kabi ochiq maydonlarga ajratiladi. Shuningdek, 35 kilometr yugurish yoʻlakchasi va 9 kilometr ot minish yoʻlakchasi ham boʻladi.
