Ўзбекистон Президенти Шавкат Мирзиёев Будапешт шаҳрида Венгриянинг етакчи компания ва банклари раҳбарлари билан учрашув ўтказди, дея хабар бермоқда Президент матбуот хизмати.
Тадбирда Венгрия иқтисодий ривожланиш вазири Мартон Надь, Савдо-саноат палатаси раиси Ласло Парраг, «OTP Bank» раиси Шандор Чаньи ҳамда йигирмага яқин энг йирик компания ва корпорациялар раҳбарлари иштирок этди.
Учрашувда фармацевтика, қишлоқ хўжалиги, озиқ-овқат саноати, электроника ва электротехника, кимё, тўқимачилик, чарм тармоқлари ва автомобилсозлик каби соҳаларда ўзаро ҳамкорлик масалалари муҳокама қилинди. Шунингдек, тадбирда лойиҳаларни молиялаштириш учун қўшма фонд ташкил этилиши ва у тез фурсатда иш бошлаши айтилди. Таъкидланишича, охирги 5 йилда Ўзбекистон ва Венгрия ўртасида товар айирбошлаш ҳажми 3 баробар кўпайган.
Шавкат Мирзиёев ҳар бир венгриялик тадбиркорни Ўзбекистонга келиб, бугунги кунда инвестициялар учун энг яхши жой Ўзбекистон эканлигига шахсан ишонч ҳосил қилишни таклиф қилди.
Учрашув якунида илгари сурилган барча лойиҳаларни амалга ошириш бўйича аниқ муддатлар ва масъул ижрочилар кўрсатилган комплекс «йўл харитасини» қабул қилишга келишиб олинди. Шу билан бирга, Ўзбекистон—Венгрия бизнес форумида умумий қиймати 1 миллиард доллардан зиёд инвестиция, савдо ва молиявий келишувлар имзоланди.
