Жазоир ҳукумати Францияга табиий газ етказиб беришни 50 фоизга ошириш имкониятини кўриб чиқмоқда. Бу ҳақда «Европа-1» радиостанцияси хабар берди.
Радиостанция маълумотларига кўра, ҳозирча гап Жазоирнинг оғзаки мажбуриятлари ҳақида кетмоқда.
«Яқин бир неча соат ичида Франциянинг Engie энергетика компанияси ва Жазоир ўртасида газ етказиб беришни кўпайтириш мажбуриятини тасдиқлаш, шунингдек, ушбу ҳажмларга аниқлик киритиш учун музокаралар ўтказилиши керак», дейилади хабарда.
Таъкидланишича, Франция Жазоир газига жиддий қарам бўлмаса-да, ҳозирги шароитда экспортни 50 фоизга ошириш имконияти Парижга Россиядан газ импортини тўхтатиш билан қисман чидашга имкон беради.
Франция Президенти Эмманюэль Макрон 25 август куни Жазоирга борди. Макрон Жазоирнинг «Европа газ таъминотини диверсификация қилиш»даги роли муҳим эканини таъкидлади.
Жазоир Африкадан Европага энг йирик газ етказиб берувчи давлат ҳисобланади. Европа мамлакатлари истеъмол қиладиган газнинг 11 фоизи у ердан келади. Жазоир гази Францияда мамлакат бозорининг 8 фоизини эгаллайди.
Францияга газ етказиб берувчи энг йирик давлатлар Норвегия (36 фоиз) ва Россия (Украинага ҳужум бошланишидан олдин 17 фоиз) эди.
Аввалроқ Европа Иттифоқи Озарбойжон билан газ етказиб беришни муҳокама қилган эди. Ўшанда Европа Комиссияси президенти Урсула фон дер Ляйен Брюссель Осиёнинг айрим давлатлари билан музокаралар олиб бораётганини қайд этганди.
Шунингдек, Европа Иттифоқи Россиядан Европага газ етказиб бериш тўхтатилганидан сўнг Озарбойжон билан газ импорти бўйича келишув имзолашга тайёрланаётгани хабар қилинди.
Россия, ЕИ ва газ
Аввалроқ Исроил Европа Иттифоқи давлатларига табиий газ экспорт қилиш бўйича келишувни имзолаганди.
Шунингдек, Буюк Британия газ танқислигига дуч келса, мамлакат континентал Европага энергия етказиб беришни бутунлай тўхтатишга киришиши мумкинлиги хабар қилинди.
Россия нефтига қисман эмбаргони ўз ичига олган санкцияларнинг олтинчи пакети қабул қилинганидан сўнг Европа Иттифоқи Россиядан газ импортини тақиқлашни ўз ичига олиши мумкин бўлган еттинчи санкциялар пакети устида иш бошлади.
Бироқ энергетика бўйича Россияга энг тобе бўлган давлатлар бунга қарши чиқмоқда, баъзи Европа давлатлари эса Россиядан тўғридан-тўғри газ олишни аллақачон тўхтатган.
Масалан, аввалроқ Польша, Нидерландия, Дания, Болгария ва Финляндия янги схема бўйича Россия гази учун рублда пул тўлашдан бош тортган эди.
Шунингдек, АҚШ тарихда биринчи марта Европа Иттифоқига газ етказиб беришда Россиядан ўтиб кетгани ҳақида хабар берилди.
