«Россия темир йўллари» очиқ акциядорлик жамияти Узоқ Шарқ темир йўли бўйлаб Находка шаҳридаги «Восточний» порти орқали Кореядан Ўзбекистон ва Қозоғистонга контейнерларни экспорт қилишда қийинчиликларга учраётганини маълум қилди. Бу ҳақда «Коммерсанть» хабар берди.
Маълум бўлишича, бу порт орқали Ўзбекистонга автомобиль комплектлари ва заводларига керак бўладиган бошқа юклар жўнатилади. Корхона контейнер жўнатиш ҳажмини ошириш учун йукларни портга кўмир туширган усти очиқ вагонларга контейнер ўрнатиш йўли билан жўнатишни таклиф қилган. Лекин маҳаллий стивидорлар (юк ташиш ва туширишга масъул бўлган вакиллар) бу таклифни қабул қилишга тайёр эмаслиги айтилган.
Мутахассисларнинг фикрича, оддий вагонлар ўрнига усти очиқ вагонларда юк ташиш фақат жараённинг барча иштирокчилари хоҳласагина амалга оширилиши керак. Маҳаллий стивидорлик компаниясининг қайд этишича, усти очиқ вагонлар ихтисослашган темир йўл платформаларидан фарқли ўлароқ контейнерларни ташиш учун мослаштирилмаган.
«Контейнерларни ташиш учун ярим вагонлардан фойдаланиш қимматроқ, секинроқ ва хавфлироқ саналади. Биз бу чорани самарасиз деб ҳисоблаймиз», дейилади Global Ports корхонаси муносабатида.
Таъкидланишича, бу чора тескари натижа бериши ва порт ишини янада секинлаштириши мумкин.
Аввалроқ Ўзбекистонга Россиядан махсус поезд рейслари амалга оширилиши хабар қилинганди.
Маълум қилинишича, «Ўзбекистон темир йўллари» акциядорлик жамияти томонидан Волжский–Тошкент йўналишида 483-сонли йўловчи поездининг 5 та махсус рейси йўлга қўйилади. Поездлар 2021 йил 15, 19, 22, 26, 29 ноябрь кунлари соат 20:57 да Волжский–Тошкент йўналишида ҳаракатини амалга оширади.
