Буюк Британияда йиллик инфляция 1982 йилдан бери биринчи марта 10 фоизгача тезлашди. Бу ҳақда Миллий статистика хизмати (МСХ) ҳисоботида маълумотлар келтирилди.
Қайд этилишича, истеъмол нархлари индекси (ИНИ) июль ойида июнь ойига нисбатан яна 0,6 фоизга ошган. Оқибатда ўтган 12 ой давомида индекснинг ўсиши 10,1 фоизни ташкил этган.
Буюк Британияда нархлар иқтисодчилар прогноз қилганидан тезроқ кўтарилмоқда. Июль ойида ИНИ йилига 9,8 фоизгача кўтарилиши кутилган эди.
МСХ маълумотларига кўра, озиқ-овқат ва алкоголсиз ичимликлар ИНИ ўсишига энг катта ҳисса қўшган. Июнь ойининг ўзида уларнинг нархи ўртача 2,3 фоизга ошган.
Бу товарлар 2001 йилнинг май ойидан бери бунчалик тез кўтарилмаган эди. Йиллик ўсиш аллақачон 12,7 фоизни ташкил этди — бу 2008 йил августидан кейинги энг юқори кўрсаткич.
Аввалроқ Англия банки электр энергияси нархининг ошиши сабабли Буюк Британияда йиллик инфляция кузда 13 фоизгача тезлашиши ва мамлакат иқтисодиёти узоқ давом этадиган таназзулга юз тутиши мумкинлиги ҳақида огоҳлантирган эди.
Мавзуга доир:
