Davlat soliq qoʻmitasi chek berilmaganligi haqida shikoyat kelib tushsa, soliq tekshiruvi qanday asosda oʻtkazilishi boʻyicha tushuntirish berdi.
Qoʻmitaga koʻra, bunday holda Vazirlar Mahkamasining 2021 yil 7 yanvardagi 1-sonli qaroriga asosan pulli hisob-kitoblarni amalga oshirishda nazorat-kassa texnikasi qoʻllanilishi yuzasidan sayyor soliq tekshiruvi oʻtkaziladi.
Unda, jumladan, quyidagilar tekshiradi:
- soliq toʻlovchi tomonidan foydalanilayotgan nazorat-kassa texnikasi va hisob-kitob terminali tegishli qonun hujjatlari talablariga muvofiqligi;
- xaridorlarga nazorat-kassa texnikasi cheki yoki unga tenglashtirilgan boshqa hujjatlar berilishi.
Qayd etilishicha, sayyor soliq tekshiruvini tayinlash toʻgʻrisidagi buyruq uni amalga oshirish dasturini tasdiqlaydi, unda tekshirilishi kerak boʻlgan masalalar roʻyxati aks ettiriladi. Soliq solish obyektlari va soliq solish bilan bogʻliq obyektlar toʻgʻrisidagi axborotni aniqlashtirishda bu dasturga asosan quyidagilar tekshirilishi mumkin:
- davlat roʻyxatidan oʻtganligi toʻgʻrisidagi hujjatlar, faoliyat turi va joyining soliq toʻgʻrisidagi qonun hujjatlariga muvofiqligi;
- soliq toʻlovchiga mulk huquqi asosida tegishli boʻlgan mol-mulk negizida, shuningdek, bu mol-mulkka egalik qilish va (yoki) undan foydalanishga yoʻl qoʻyadigan boshqa ashyoviy huquq asosida mol-mulkka va yer uchastkalariga boʻlgan huquqni tasdiqlovchi hujjatlar mavjudligi.
Bundan tashqari, sayyor soliq tekshiruvi doirasida soliq toʻlovchi — yuridik shaxslar ishchi-xodimlarining haqiqiy soni va soliq hisobotida aks ettirilgan ishchi-xodimlar soniga muvofiqligi tekshiruvi amalga oshirilishi mumkin. Taʼkidlanishicha, sayyor soliq tekshiruvi doirasida uni amalga oshirish dasturida nazarda tutilgan holatlar boʻyicha tekshiruv oʻtkazilishi kerak.
Avvalroq soliq huquqbuzarliklari haqida xabar bergan yana 15 kishiga 9 mln soʻm toʻlab berilgani xabar qilingandi.
2022 yil 1 yanvardan soliq huquqbuzarliklari haqida “Soliq” mobil ilovasining “Soliq hamkor” boʻlimi orqali xabar bergan fuqarolarga huquqbuzarlardan undirilgan jarima summasining 20 foizi miqdorida mukofot toʻlanishi belgilangan.
2022 yil 1 yanvardan 4 fevralga qadar “Soliq hamkor” orqali yoʻllagan murojaatlari oʻz tasdigʻini topgan fuqarolarga jami 17,5 mln soʻm mukofot tayinlangan boʻlib, ayni paytda 15 nafar fuqaroga 9 million soʻm mukofot toʻlab berilgan.
Fuqarolar “Soliq hamkor” orqali:
- chek bermaslik;
- bank plastik kartasi orqali toʻlovni qabul qilishni rad etish;
- bank plastik kartasi orqali toʻlov amalga oshirilganda mahsulotni qimmat sotish;
- noqonuniy tadbirkorlik faoliyati;
- markirovkalanishi kerak boʻlgan mahsulotni markirovkasiz (yoki qalbaki markirovka bilan) sotish va shu kabi soliq huquqbuzarliklari haqida xabar berishi mumkin.
