Davlat soliq qoʻmitasi E-imtiyoz axborot tizimi orqali soliq turlari, hududlar va meʼyoriy-huquqiy hujjatlar kesimida imtiyozlardan foydalanish boʻyicha tayyorlangan tahliliy maʼlumotlarni eʼlon qildi.
Maʼlum boʻlishicha, 2022 yilning dastlabki 6 oyi davomida yuridik shaxslar 75 mingta holatda 24,6 trillion soʻm soliq imtiyozlaridan foydalangan. Jami imtiyozning 8,5 trillion soʻmiga qoʻshilgan qiymat soligʻining nol stavkasi qoʻllanilgan.
Shundan meʼyoriy-huquqiy hujjatlar boʻyicha:
- Soliq kodeksiga asosan — 22,5 trillion soʻm;
- Oʻzbekiston Respublikasi Qonuni, Prezident farmonlari, qarorlari, Vazirlar Mahkamasi qarorlari va boshqa hujjatlarga asosan — 2,1 trillion soʻm qoʻllanilgan.
Soliq turlari kesimida eng koʻp qoʻllanilgan imtiyoz qoʻshilgan qiymat soligʻi boʻyicha boʻlgan — 22,4 trillion soʻm yoki 91,1 foiz. Boshqa soliq turlaridan esa 2,2 trillion soʻm (8,9 foiz) miqdorida foydalanilgan.
Yirik soliq toʻlovchilar boʻyicha hududlararo davlat soliq inspeksiyasi korxonalari tomonidan jami imtiyoz summasining 18 trillion soʻm qismi foydalanilgan. Imtiyozning qolgan 6,6 trillion soʻm qismi Respublikaning boshqa hududlariga toʻgʻri kelgan.
Avvalroq Davlat soliq qoʻmitasi individual soliq imtiyozlari teng raqobatga va iqtisodiyotning barqaror rivojlanishiga salbiy taʼsir koʻrsatishini qayd etib, ularning hajmi boʻyicha maʼlumot bergandi.
Qoʻmitaning qayd etishicha, 2021 yilda individual hususiyatga ega boʻlgan 15 ta hujjat boʻyicha jami 316,2 milliard soʻmlik, 2022 yilning dastlabki 6 oyi davomida esa 10 ta hujjat boʻyicha jami 144,8 milliard soʻmlik soliq imtiyozi qoʻllanilgan.
Bundan tashqari, yuridik shaxslar tomonidan: 2021 yilda 43,4 trillion soʻmdan, 2022 yil I yarim yilligida esa 24,6 trillion soʻmdan ziyod soliq imtiyozlaridan foydalanilgan.
