Олтин нархи 22 июль куни яна кўтарилди ва беш ҳафталик пасайишдан кейин бу ҳафта ижобий натижа билан якунланди. Бу ҳақда MarketWatch хабар берди.
Нью-Йорк товар биржасида (NYMEX) август ойидаги шартномалар котировкалари савдолар жараёнида 0,6 фоизга кўтарилиб, ҳар бир унция учун 1 724,20 долларни ташкил қилди.
Сентябрь ойида етказиб бериладиган кумуш эса 0,1 фоизга арзонлаб, унцияси 18,70 доллардан баҳоланди.
«Бу ҳафта АҚШ давлат облигациялари даромадлилигининг пасайиши олтин нархининг ошишига ёрдам берди», — деди OANDA катта бозор таҳлилчиси Крейг Эрлам.
АҚШ ғазначилигининг ўн йиллик қимматли қоғозларининг даромадлилиги 22 июль куни 2,82 фоизлик ҳудудда бўлиб, 21 июль, савдолар бошланганидан бери йигирма базавий пунктдан кўпроққа пасайди.
Олтин нархи Россия Украинага ҳужум қилмасидан олдинроқ, 17 февраль куни 2021 йилнинг июнь ойидан бери кузатилган энг юқори кўрсаткичга чиқиб, бир унция учун 1900 долларни ташкил қилган эди.
АҚШ июнь ойида Россия олтинига қарши санкция жорий қилди. Вашингтон Россия олтинини мамлакатга олиб киришни тақиқлади.
Аввалроқ Швейцария қимматбаҳо металлар ишлаб чиқарувчилари ва савдогарлари уюшмаси (ASFCMP) Россия қўшинлари Украинага бостириб кирганидан бери аъзолар Россия олтинини сотиб олмаганини маълум қилганди.
