Xiva shahrida 4–5 iyun kunlari oʻtkazilishi rejalashtirilgan “Pahlavon Mahmud — bahodirlar oʻyini” xalqaro turnirining ochilish marosimi boʻlib oʻtdi. Bu haqda unda ishtirok etgan “Bugun.uz” muxbiri xabar berdi.
Tadbir Turizm va madaniy meros vazirligi, Butunjahon strongmenlar federatsiyasi hamda Xorazm viloyati hokimligi bilan hamkorlikda oʻtkazilmoqda. Xiva faylasuf va polvon sifatida tanilgan Paxlavon Mahmudning vatani hisoblanadi. Xalqaro tadbir 2019 yilda ilk bor Xivada oʻtkazilgandi. Turnirga dunyoning 14 davlatidan, jumladan, Braziliya, Yangi Zelandiya, Italiya, Ispaniya, Fransiya, Ozarbayjon, Qozogʻiston, Eron, Hindiston, Polsha, Yaponiya, Tojikiston va Oʻzbekistondan 15 nafar sportchi ishtirok etmoqda.
Keltirilishicha, ular musobaqaning 7 turi boʻyicha bellashadi. Marosimda nogironligi boʻlgan shaxslar oʻrtasida sportning paralimpiya chiqishlari boʻlib oʻtdi. Sportchilar musobaqaning dastlabki kunida ogʻir qoplarni qoʻqon aravaga ortish va uni maʼlum masofaga olib borish va obkachni kuch bilan koʻtarish shatrlarini bajardi.
Ochilish marosimida turizm va madaniy meros vaziri Aziz Abduhakimov nutq soʻzladi.
“Shuni alohida taʼkidlash joizki, dastlab 2019 yilda tashkil qilingan «Bahodirlar oʻyini” koʻpchilikda katta taasurot qoldirdi. Unda turli mamlakatlardan 15 nafar xalqaro sportchi qatnashgandi.
Quvonarli jihati, Eron, Yaponiya va Hindiston mamlakatlarining polvonlari turnirda ikkinchi bor ishtirok etmoqda. “Bahodirlar oʻyini” xalqlar oʻrtasida doʻstlik aloqalarining rivojlanishi, jahon hamjamiyatida Oʻzbekistonning ijobiy imijining oshishi, sogʻlom hayot tarzining tashviqoti va mamlkatimiz turizm salohiyatini targʻib qilish yoʻlida xizmat qiladi», — deydi vazir.
Shuningdek, bosh vazir oʻrinbosari turnir ishtirokchilariga muvofaqqiyat tiladi.
Avvalroq Xorazm viloyati Xiva shahrida 4–5 iyun kunlari “Pahlavon Mahmud — bahodirlar oʻyini” II xalqaro turniri boʻlib oʻtishi hamda musobaqani tashkil etishdan maqsad toʻgʻrisida maʼlumot berilgandi.
