Oʻzbekiston 2030 yilgacha aholi jon boshiga YAIM hajmini 4 ming dollarga yetkaza oladi. Bu haqda Iqtisodiy tadqiqotlar va islohotlar markazi direktori Obid Hakimov Kommers.uz muxbiri bilan suhbatda aytib oʻtdi.
Muxbir prezident maslahatchisi oʻrinbosariga Oʻzbekistonning 2030 yilgacha aholi jon boshiga YAIM hajmini 4 ming dollarga yetkazish imkoniyati boʻyicha savol bilan yuzlandi. Obid Hakimovning taʼkidlashicha, buning hammasi chuqur hisob-kitoblar, modellar va prognozlar asosida oʻylangan.
“Buning hammasi chuqur hisob-kitoblar, modellar va prognozlar asosida oʻylangan. Albatta, biz 2030 yilda oʻrta yuqori daromadli mamlakatlar qatoriga kiramiz”, — deydi Hakimov.
Avvalroq bosh vazir oʻrinbosari — iqtisodiy taraqqiyot va kambagʻallikni qisqartirish vaziri Jamshid Qoʻchqorov 2030 yilga borib Oʻzbekistonda aholi soni 40 mln kishiga, yalpi ichki mahsuloti esa 160 mlrd dollarga, jon boshiga YAIM esa 4 ming dollarga yetishi prognoz qilinayotganini aytgandi.
Eslatib oʻtamiz, Oʻzbekistonda 2021 yil aholi jon boshiga hisoblangan yalpi ichki mahsulot hajmi joriy narxlarda 21,04 million soʻm yoki 1983 dollarni tashkil etdi.
Maʼlumotlarga koʻra, 2021 yilgi koʻrsatkich 2020 yilga qaraganda 5,3 foizga oʻsgan. Aholi jon boshiga hisoblangan YAIMning oʻsish surʼati 105,3 foizni tashkil etgan.
