Ўзбекистон Марказий банки июль ойида қарийб 1 тонна олтин сотди, бироқ дунёдаги энг йирик олтин харидорлари қаторида қолмоқда. Бу ҳақда Жаҳон олтин кенгаши (World Gold Council) маълум қилди.
Ташкилот маълумотларига кўра, июль охирида Ўзбекистоннинг олтин захиралари қарийб 431 тоннани ташкил этган. Мамлакат халқаро захираларининг тахминан 87 фоизи олтин ҳиссасига тўғри келган.
Июль ойида дунё марказий банклари олтин захираларини кўпайтиришда давом этди: соф харидлар 23 тоннани ташкил қилди. Ой давомида энг кўп олтин сотиб олган давлатлар Хитой (20 тонна) ва Польша (8 тонна) бўлди.
Энг йирик сотувчи Россия бўлиб, олтин захираларини 6 тоннага камайтирган. Туркия, Иордания ва Ўзбекистон қарийб 1 тоннадан олтин сотган.
Июль ойидаги сотувга қарамай, январь-июль якунларига кўра, Ўзбекистон йирик олтин харидорларидан бири бўлиб қолди. Марказий банкнинг йил бошидан буён соф харидлари 40 тоннага етди.
Жаҳон олтин кенгаши маълумотларига кўра, ушбу даврда Польша қарийб 90 тонна, Хитой 60 тонна, Ўзбекистон эса 40 тонна олтин сотиб олган. Қозоғистон қарийб 29 тонна харид қилган.
Шу тариқа, Ўзбекистон шарҳда келтирилган йил бошидан буён энг йирик соф олтин харидорлари орасида учинчи ўринни эгалламоқда.
Жами дунё марказий банклари январь-июль ойларида қарийб 130 тонна соф олтин хариди ҳақида маълум қилган. 2025 йилнинг шу даврида бу кўрсаткич қарийб 160 тоннани ташкил этган.
Марказий банк олтинни «қулай нархларда» сотиш имкониятини кўриб чиқмоқда
Жаҳон олтин кенгаши Ўзбекистон Марказий банки раиси Тимур Ишметовнинг яқиндаги баёнотларига ҳам эътибор қаратди.
Ташкилот маълумотларига кўра, МБ раиси олтин «ҳозирча энг яхши инвестиция бўлиб чиққанини» айтган. Бироқ регулятор халқаро захираларни бошқариш доирасида уни «қулай нархларда» сотиш имкониятини кўриб чиқмоқда.
Аввалроқ Марказий банк захиралардаги олтин ҳажмининг ўзгариши ҳам жаҳон нархларидаги ўзгаришлар, ҳам қимматбаҳо металлни сотиб олиш ва сотиш операциялари билан боғлиқ бўлиши мумкинлигини бир неча бор тушунтирган.
Бошқа мамлакатларда вазият қандай?
Польша йил бошидан буён энг йирик олтин харидори бўлиб қолмоқда. Етти ойда мамлакат марказий банки қарийб 90 тонна олтин сотиб олиб, захираларини 640 тоннага етказган. Бу мамлакат жами захираларининг тахминан 28 фоизини ташкил этади. Польша олтин захираларини 700 тоннага етказишни мақсад қилган.
Хитой июлда яна 20 тонна олтин сотиб олган — харидлар кетма-кет 21 ой давом этган. Йил бошидан буён Хитой Халқ банки захираларини қарийб 60 тоннага ошириб, 2366 тоннага етказган. Олтин мамлакат захираларининг тахминан 8 фоизини ташкил этади.
Қозоғистон июлда қарийб 1 тонна, йил бошидан буён эса 29 тонна олтин харид қилган. Олтин мамлакат халқаро захираларининг тахминан 75 фоизини ташкил этади.
Россия эса июлда қарийб 6 тонна олтин сотиб, йил бошидан буён захираларини тахминан 50 тоннага камайтирган. Туркия йил бошидан буён қарийб 85 тонна олтин сотган.
Жаҳон олтин кенгаши айрим сотувларга қарамай, марказий банкларнинг олтинга қизиқиши сақланиб қолаётганини қайд этмоқда. 2026 йилда қатор регуляторлар мамлакат ичидаги омборларни кенгайтириш ва олтин сақланадиган хорижий жойларни диверсификация қилиш имкониятини ҳам кўриб чиқмоқда.
2026 йилда олтин экспорти фақат икки марта — апрель ва июль ойларида қайд этилган. Бунга қадар Ўзбекистон сўнгги марта 2025 йил сентябрида хорижга қарийб 1,5 млрд долларлик олтин етказиб берган.
