Россиялик тадбиркор Олег Тиньков ўзининг La Datcha кўчмас мулк ижараси хизматини сотди. Миллионер бу ҳақда Юрий Дудь билан суҳбатда айтиб ўтди.
Тиньков Россиядаги бизнеси аниқ қанча пулга сотилганини айтмади, лекин қиймат «бозор нархида» эканини таъкидлади. Тадбиркор La Datcha кўчмас мулк ижараси хизматига 2016 йилда асос солган.
Олег Тиньков ўзига тегишли бўлган кўчмас мулкларни ижарага беришда давом этмоқда. Тадбиркорнинг сўзларига кўра, бу иш билан қизи шуғулланади.
Тиньков атрофидаги вазият ва босимлар
Аввалроқ Tinkoff Bank асосчиси Олег Тиньков Украинадаги воқеалар ҳақида очиқ баёнот берганидан кейин банкдаги улушини «бир тийинга» сотишга мажбур бўлганини айтганди.
Унинг сўзларига кўра, Олег Тиньков 20 апрель куни Украинага ҳужумга қарши постини эълон қилганидан бир кун ўтиб, Кремль Tinkoff Bank раҳбарияти билан боғланиб, тадбиркор ўз улушини сотмаса, банкни миллийлаштириш билан таҳдид қилган.
Тиньковнинг танқиди
Банк асосчиси Олег Тиньков Россиянинг Украинага босқини ҳақида кескин сўзлар ёзилган пост эълон қилди. Постда Тиньков ҳозирги воқеалардан бирорта ҳам манфаатдор кўрмаётгани, россияликларнинг 90 фоизи босқинга қарши эканини айтди ва инглиз тилида Ғарбни янада оқилона ва инсонпарвар бўлишга ҳамда содир бўлаётган воқеаларни тўхтатишга чақирди.
Шундан сўнг Tinkoff Bank баёнот эълон қилди, унда ташкилот ўз асосчисининг сўзларини шахсий фикр деб қабул қилишни сўради.
Банк хабарида айтилишича, Олег Тиньков кўп йиллар давомида Tinkoff Group компанияларида қарор қабул қилувчи шахс бўлмаган, у Tinkoff ходими ҳам эмас, Россияда узоқ вақт бўлмаган ва сўнгги йилларда соғлиғи билан боғлиқ муаммолар билан банд бўлган.
Олег Тиньков аввалроқ — февраль ойининг охирида ҳам Россиянинг Украинага босқинини қоралаганди.
«Мен ўзим, деярли икки марта ҳаётнинг нариги томонида бўлганимда, сўнгги 2 йил ичида унинг қанчалик нозик эканига амин бўлдим! Ва у биз эга бўлган ягона нарса! Ҳозир Украинада ҳар куни бегуноҳ одамлар ўлмоқда, буни ақлга сиғдириб ва қабул қилиб бўлмайди!», — деб ёзганди Тиньков.
Унинг таъкидлашича, давлатлар пулни ҳарбий ҳаракатларга эмас, балки одамларни даволаш ва илмий тадқиқотларга сарфлаши керак.
