Yaponiya Ukrainaga qilingan harbiy hujum tufayli sanksiyalar doirasida Rossiyadan neft importini bosqichma-bosqich toʻxtatadi, deya maʼlum qildi Yaponiya bosh vaziri Fumio Kisida G7 sammitida.
“Biz importni aholi hayoti va biznesiga salbiy taʼsirlarni minimallashtiradigan tarzda bosqichma-bosqich toʻxtatish choralarini koʻramiz”, — dedi u.
Kishidaning taʼkidlashicha, bu “qiyin” qaror, chunki Yaponiya uchun energiya importi ahamiyatli, ammo “hozirgi paytda G7 birligi [Rossiya neft embargosi boʻyicha] juda muhim”.
Shu bilan birga, bosh vazirning aytishicha, Tokio “Saxalin-1” va “Saxalin-2” neft-gaz loyihalaridagi ulushlarini saqlab qoladi.
Nikkei nashrining yozishicha, Yaponiya mamlakat energiya isteʼmolining qariyb 90 foizini xorijdan import qiladi, Rossiya esa mamlakatga suyultirilgan gaz yetkazib berish boʻyicha beshinchi oʻrinda turadi.
“Saxalin-1”da Yaponiya Iqtisodiyot, savdo va sanoat vazirligi, Itochu va Itochu savdo kompaniyalari, neft qazib oluvchi Japan Petroleum Exploration Company (Japex) va boshqalar ishtirok etmoqda.
“Saxalin-2” aksiyadorlari orasida Yaponiyaning Mitsui va Mitsubishi kompaniyalari bor, ular mos ravishda 12,5 va 10 foiz ulushga ega.
Iqtisodiyot vaziri Koiti Xagiuda avvalroq Yaponiya “Saxalin-2”dagi oʻrnini boshqa davlat egallashidan choʻchib, uni tark etmasligini aytgandi. Bloomberg maʼlumotlariga koʻra, Xitoy kompaniyalari Tokio ulushiga qiziqish bildirgan.
“Katta yettilik” kelishuvi
AQSH Oq uyi “Katta yettilik”ning barcha davlatlari Rossiya nefti importini bosqichma-bosqich toʻxtatish va Rossiya byudjeti daromadlarini qisqartirish uchun embargo joriy etishga kelishib olganini maʼlum qildi.
G7 qoʻshma bayonotida aytilishicha, olib chiqish jarayoni muqobil eksportchilardan maqbul narxlarda yetkazib berish kafolati bilan “oʻz vaqtida va tartibli” amalga oshiriladi. Bunga, jumladan, qazib olinadigan yoqilgʻiga qaramlikni kamaytirish va toza energiyaga oʻtish orqali erishish rejalashtirilgan.
Shuningdek, 8 mart kuni Qoʻshma Shtatlar Ukraina boʻyicha sanksiyalar doirasida Rossiyadan neft va boshqa energetika mahsulotlarini import qilishni taqiqladi. Buyuk Britaniya ham xuddi shunday qadam tashladi.
May oyi boshida Yevropa Ittifoqi tomonidan Rossiyaga qarshi neft embargosi joriy etilishi haqida Yevrokomissiya rahbari Ursula fon der Lyayen eʼlon qilgan edi. Uning taʼkidlashicha, Yevropa davlatlari olti oy ichida xom neft yetkazib berishni toʻxtatish, 2022 yil oxiriga kelib esa Rossiyadan neft mahsulotlarini sotib olishni butunlay toʻxtatish niyatida.
YEIning Rossiyaga qarshi sanksiyalari va AQSH
Avval xabar qilinganidek, diplomatlar Yevropa Ittifoqining yaqinlashib kelayotgan sanksiyalari haqida Yevropa Komissiyasi tomonidan taklif qilingan oltinchi cheklovlar paketini muhokama qilmoqda.
Bu Rossiya neftining importiga bosqichma-bosqich embargo va uni dengiz orqali tashish uchun sugʻurta hamda transport xizmatlarini taqiqlashni, Rossiyadan yana ikkita bankni SWIFT moliyaviy maʼlumotlarini uzatish tizimidan uzishni oʻz ichiga oladi.
