Yevropa Ittifoqi qonun chiqaruvchilari qariyb 16 soat davom etgan muzokaralardan soʻng tarmoqdagi foydalanuvchilarning axborot xavfsizligini taʼminlashga qaratilgan yangi “Raqamli xizmatlar toʻgʻrisida”gi qonunni qabul qilshga kelishib oldi. Bu haqda Financial Times xabar bermoqda.
Yangi qoidalarga koʻra, yirik IT korporatsiyalar endi voyaga yetmaganlarga reklama koʻrsata olmaydi, shuningdek, foydalanuvchining dini, jinsi yoki jinsiy afzalliklari kabi shaxsiy maʼlumotlardan boshqa maqsadlar uchun foydalana olmaydi.
Bundan tashqari, Internet-platformalardan dezinformatsiya va tashviqotga qarshi kurashish va bu haqda Yevropa regulyatorlariga muntazam ravishda hisobot berish talab etiladi.
Shuningdek, kompaniyalarga interfeys elementlari orqali foydalanuvchi xatti-harakatlarini manipulyatsiya qilish, masalan, maʼlumotlarni kuzatish uchun rozilik olish taqiqlanadi. Amalga oshirilgan chora-tadbirlar IT gigantlari faoliyatini tartibga soluvchi qonunlarni yigirma yildan ortiq vaqt ichida eng muhim qayta koʻrib chiqishdir.
«Platformalar kontentni moderatsiya qilish boʻyicha qarorlar qabul qilishda shaffof boʻlishi, xavfli notoʻgʻri maʼlumotlar tarqalishining oldini olishi va xavfli mahsulotlarning bozorlarda sotilishiga yoʻl qoʻymasligi kerak.
Bugungi kelishuv bilan biz platformalar oʻz xizmatlari jamiyat va fuqarolar uchun yuzaga kelishi mumkin boʻlgan xavflar uchun javobgar boʻlishini taʼminlaymiz», — dedi YEIning raqamli siyosat boʻyicha ijrochi vitse-prezidenti Margrete Vestager.
Yevropa Ittifoqining ichki bozor boʻyicha komissari Tyerri Bretonning soʻzlariga koʻra, qoidabuzarlar katta jarimaga tortiladi va hatto ularning Yevropada biznes yuritishi taqiqlanadi.
Komissiya “global aylanmaning 6 foizigacha boʻlgan samarali va toʻxtatuvchi sanktsiyalarni qoʻllashi yoki hatto jiddiy qoidabuzarliklar takrorlangan taqdirda Yevropa Ittifoqi yagona bozoridagi faoliyatni taqiqlashi mumkin”.
Avvalroq Yevropa Ittifoqining yangi qonuni WhatsApp, Facebook Messenger (Meta kompaniyasiga tegishli) va iMessage messenjerlarini oʻzaro hamda boshqa kichikroq platformalar bilan hamkorlik qilishga majbur qilishi mumkinligi haqida xabar berilgandi.
Agar qonun qabul qilinsa, Meta va Apple oʻz messenjerlarini ishlab chiquvchilar iltimosiga koʻra boshqa kichikroq xabar almashish platformalari bilan “moslashtirishi” kerak boʻladi.
Shuningdek, Ittifoq WhatsAppʻga messenjerning foydalanish shartlariga kiritgan oʻzgarishlariga aniqlik kiritish va ularni Yevropa Ittifoqining foydalanuvchilar huquqlarini himoya qilish qonunchiligiga muvofiqlashtirish uchun bir oy muddat bergandi.
