Россия Президенти Владимир Путин 20 апрель куни йирик бизнес эгалари ва раҳбарлари билан учрашув ўтказади, деб хабар берди Bloomberg ахборот манбалари. Йиғилиш кун тартиби ҳали эълон қилинмаган.
Президент матбуот котиби Дмитрий Песковнинг сўзларига кўра, бу маълумот «қисман ҳақиқатдир». Унинг таъкидлашича, 20 апрель куни Путин металлургия саноатидаги вазият бўйича йиғилиш ўтказишни режалаштирмоқда.
«Президент соҳавий учрашувларни давом эттирмоқда. Бизда умумий иқтисодиёт бўйича анъанавий йиғилиш бўлди, аммо бу ҳафта Президент ва ҳукумат металлургия саноати масалалари билан ҳам шуғулланади», — дея тушунтирди Песков.
Путин россиялик бизнес вакиллари билан охирги марта 24 февралда — Украинага ҳужум бошланган куни учрашганди.
Бунда давлат раҳбари бизнесни «ишлаб чиқаришни, иқтисодиётни, иш ўринларини қўллаб-қувватловчи, лекин юзага келаётган воқеликдан келиб чиқадиган воситаларни излашда ҳукумат билан бирдамликда ишлашга» чақирган.
Bloomberg’нинг қайд этишича, телевизион учрашув ЕИ томонидан «бир қанча россиялик тадбиркорларга нисбатан санкциялар қўллаш учун баҳона сифатида фойдаланилган», чунки, Брюсселга кўра, бу уларнинг Путинга яқинлигини кўрсатган.
