“Sberbank” boshqaruvi raisining sobiq birinchi oʻrinbosari Lev Xasis AQSHga joʻnab ketdi, deb xabar bermoqda “Vedomosti” manbalari. U Amerika fuqaroligiga ega.
Nashrning yozishicha, bank unga elektron tijoratni ishonib topshirishni rejalashtirgan boʻlsa-da, u bilan hamkorlikni davom ettirmaydi.
“Vedomosti” manbalari Xasisning mamlakatni qachon tark etgani haqida turli maʼlumotlarni keltirmoqda. Biri u Rossiyaning Ukrainaga hujumi boshlanganidan soʻng darhol chiqib ketganini daʼvo qilsa, ikkinchisi Xasis bundan biroz oldin mamlakatni tark etganini taʼkidlaydi.
Nashr suhbatdoshining fikricha, sobiq top-menejerning ketishi bankning “Samokat” xizmatidagi vaziyatni murakkablashtiradi. Bu, xususan, hududlardagi xizmat ishining qisqarishiga olib keldi.
“U ʻSberbankʻ top-menejerlari orasida birinchilardan boʻlib mamlakatni tark etdi, bu esa xodimlarni hayratda qoldirdi. Undan keyin texnologik blokni boshqargan David Rafalovskiy (katta vitse-prezident, guruhning texnik direktori — tahr.) ham Rossiyadan ketdi”, — dedi bankdagi nashr manbasi.
Maʼlumot uchun, 15 aprel kuni “Sberbank” Xasisning 2022 yil 1 iyundan boshlab bank boshqaruvi raisining birinchi oʻrinbosari lavozimini tark etish toʻgʻrisidagi qarori tasdiqlangani haqida xabar berdi. Shundan soʻng u elektron tijorat holdingining prezidenti boʻlishi rejalashtirilgan edi.
Avvalroq “Yandeks” kompaniyasining Rossiyadagi bosh direktori Yelena Bunina mamlakatni tark etgandi.
