Oʻzbekistonda “Ayollar daftari”ga kiritilganlarga 5 million soʻmgacha kreditlar naqd berilishi mumkin. Hukumat qarori bilan “Ayollar daftari”ni yuritish orqali xotin-qizlar muammolarini tizimli ravishda hal etish va ularni ijtimoiy qoʻllab-quvvatlash tartibi toʻgʻrisidagi nizom tasdiqlandi.
Unga muvofiq, “Ayollar daftari”ga 30 yoshdan oshgan quyidagi xotin-qizlar kiritiladi:
- ijtimoiy himoyaga muhtoj ishsiz xotin-qizlar;
- tadbirkorlik qilish istagida boʻlgan ehtiyojmand xotin-qizlar;
- boquvchisi boʻlmagan ehtiyojmand xotin-qizlar;
- ijtimoiy yordamga muhtoj I va II guruh nogironligi boʻlgan, tezkor tibbiy muolajaga muhtoj ehtiyojmand xotin-qizlar;
- uy-joyga muhtoj xotin-qizlar;
- qaramogʻida nogironligi boʻlgan farzandlari bor ehtiyojmand xotin-qizlar.
Tadbirkorlikni yoʻlga qoʻyish uchun xotin-qizlarga 33 mln soʻmgacha 14 foizlik kreditlar:
- oilaviy tadbirkorlik uchun — 3 oydan 6 oygacha imtiyozli davr bilan 3 yilgacha;
- chorvachilik, baliqchilik, parrandachilik uchun — 1 yilgacha imtiyozli davr bilan 3 yilgacha;
- bogʻdorchilik, uzumchilik va limonchilik uchun — 3 yilgacha imtiyozli davr bilan 7 yilgacha ajratiladi.
Ayollarga 5 million soʻmgacha kreditlar naqd berilishi mumkin.
Mazkur nizom tasdiqlanishi munosabati bilan “Ayollar daftari”ga oid ilgarigi vaqtinchalik tartib bekor qilindi.
