AQSH Yevropa Ittifoqi bilan 2022 yilda Yevropa mamlakatlariga suyultirilgan gaz koʻrinishida kamida 15 milliard kub metr gaz yetkazib berish boʻyicha kelishuv tuzdi. Bu haqda Bloomberg xabar berdi.
Bir kun avval Financial Times manbalarga tayanib, boʻlajak kelishuv haqida yozgan edi. Bitimning asosiy maqsadi Yevropa Ittifoqining Rossiya tabiiy gaziga qaramligini kamaytirishdir.
Shartnoma boʻyicha rasmiy bayonot 25 mart kuni Bryusselda AQSH Prezidenti Jo Bayden va Yevropa Komissiyasi Prezidenti Ursula fon der Lyayen tomonidan beriladi. Shuningdek, kelishuvga koʻra, tomonlar maxsus ishchi guruh tuzadi.
AQSH allaqachon Rossiya yoqilgʻisini import qilishdan bosh tortgan, Buyuk Britaniya esa yil oxirigacha xuddi shunday yoʻl tutishga vaʼda bergan. Yevropada fikrlar ikkiga boʻlingan, biroq koʻplab davlatlar, jumladan, Germaniya energiya narxining yana koʻtarilishidan choʻchimoqda.
Maʼlumot oʻrnida, Rossiya Yevropaga chet el gazining 40 foizdan ortigʻini yetkazib beradi.
Avvalroq Germaniya iqtisodiyot vaziri mamlakat Rossiya energiyasiga shoshilinch embargo qoʻya olmasligini aytgani xabar qilingandi. Shuningdek, Putinning bayonotidan soʻng Yevropada gaz narxi keskin koʻtarilgani haqida xabar berildi.
