Volkswagen Groupʻga tegishli Buyuk Britaniyaning Bentley avtomobil ishlab chiqaruvchisi 2021 yilni rekord daromad va foyda bilan yakunladi. Bu haqda guruhning yillik moliyaviy hisobotida maʼlum qilindi.
Qayd etilishicha, Bentley 2021 yil davomida 14,6 mingga yaqin avtomobil sotishga muvaffaq boʻldi, bu 2020 yilga nisbatan 29,2 foizga koʻpdir. Shuningdek, bu koʻrsatkich kompaniyaning butun 102 yillik tarixidagi rekord boʻldi.
Pul koʻrinishida sotuvlar 38,9 foizga oshib, 2,8 milliard yevroni tashkil etdi. Muvaffaqiyatli sotuvlar va kompaniyaning omadli qayta tuzilishi Bentleyʻga 389 million yevro miqdoridagi rekord operatsion foydani qayd etishga yordam berdi.
Avvalroq Atlantika okeanida Volkswagen guruhiga tegishli 4 mingga yaqin avtomobilni olib ketayotgan Felicity Ace yuk kemasida katta yongʻin chiqqani xabar qilingandi. Shuningdek, Rolls-Royce va Bentley sotuvi global chip tanqisligi davrida rekord darajaga yetgani haqida xabar berildi.
