Тошкентдаги Навоий кўчаси урбанист ва транспорт мутахассиси Аркадий Гершманнинг тавсияларини ҳисобга олган ҳолда реконструкция қилинади. Бу ҳақда шаҳар ҳокимлиги матбуот хизмати хабар берди.
Маълум қилинишича, Тошкент шаҳар ҳокимлигида 15 март куни Навоий шоҳ кўчасини реконструкция қилиш бўйича янгиланган лойиҳанинг муҳокамасига бағишланган матбуот анжумани бўлиб ўтди. Аркадий Гершман иштирокчиларга амалга оширилган ишлар ҳақида маълумот берди.
Қайд этилишича, Навоий шоҳ кўчасида бошланган реконструкция қилиш ишлари маҳаллий оммавий ахборот воситалари ва шаҳар аҳлининг танқидий фикрларига сабаб бўлган. Шу сабабли, таниқли урбанист ва транспорт мутахассиси Аркадий Гершман лойиҳа устида ишлаш учун таклиф қилинган.
Гершман устуворликлари кўплаб шаҳарларда қабул қилинган схема асосида белгиланган тақдимот билан чиқди. Ушбу схема аввало кўча ҳаракатининг энг заиф иштирокчилари — пиёдалар, иккинчи ўринда — жамоат транспорти ва учинчи ўриндагина — автомобилларнинг манфаатини кўзда тутади.
Аркадий Гершман «тактик урбанизм» воситалари ҳақида сўзлаб берди, хавфсизлик оролчаларини барпо этишда қўлланиладиган, вақтинча ўрнатиладиган пластик устунчаларни, пиёдалар ўтиш йўлларида куннинг қоронғи пайтида зарур бўлган ва ҳайдовчига яхшироқ кўринадиган контраст ёритишни мисол қилиб келтирди ҳамда шаҳар шароитида ерусти пиёдалар ўтиш йўлларининг ерости ўтиш йўллари ва пиёдалар ўтиш кўприкларига нисбатан афзалликлари ҳақида маълумот берди.
Таъкидланишича, тартибга солинмаган пиёдалар ўтиш жойлари фақат битта чизиқли ҳаракатда қўлланиши мумкин, икки ва ундан ортиқ чизиқли йўлларда светофорлар бўлиши шарт.
Лойиҳага мувофиқ, пиёдалар ва транспорт қатнови тушунарсиз бўлган катта майдонлар тушунарли чизиқларгача қисқартирилиб, бунга мисол тариқасида Цирк ва Чорсу майдони яқинидаги чорраҳа келтирилди: у ерда «хавфсизлик оролчалари» ва светофорлар фазалари ёрдамида қатнов белгиланган йўналишларга бўлинади,. Ўз ўрнида бу ҳаракатланишни тушунарлироқ ва самаралироқ қилади ҳамда пиёдалар ва ҳайдовчилар ҳаракатланиши хавфсизлигини таъминлашга имкон беради.
Автомобиллар қатнови ҳаракатланишнинг энг муаммоли қисмларидан бири — чапга бурилиш учун алоҳида чизиқ ажратилиши билан ҳам тартибга солинади.
Аркадий Гершман, Транспорт вазирлиги ҳузуридаги Тошкент лойиҳа офисининг раҳбари Мурод Обидов ва Тошкент шаҳар транспорт бошқармасининг бошлиғи Анвар Жўраев журналистларнинг саволларига жавоб берди.
Қайд этилишича, пиёдалар учун хавфсизлик оролчалари ҳаракатланаётган тезкор хизмат автомобиллари учун тўсқинлик қилмайди. Сабаби ёнғин ўчириш ва тез тиббий ёрдам машиналари жамоат транспорти учун ажратилган чизиқлардан ҳаракатланиши мумкин.
Шунингдек, Фарғона йўли кўчасидаги пиёдалар ўтиши учун тор қисмлар пиёдалар учун қулайлик яратиш нуқтаи назаридан қайта кўриб чиқилади. Оқтепа майдонидаги ноқулай транспорт тугуни ўзгартирилади. Тегишли тузилмалар томонидан майдонни реконструкция қилиш бўйича тўртта вариант кўриб чиқилмоқда.
Бундан ташқари, автомобилларнинг автобуслар учун ажратилган чизиққа чиқиши жаримага тортилади, бу мақсадда фото- ва видеофиксация учун техник воситалар тайёрланмоқда.
Навоий шоҳ кўчасидаги мураккаб бурилиб қайтиш жойлари сабабли, Цирк яқинида ҳамда пиёдалар ўтиш жойларида машиналарнинг бурилиб қайтиши учун имкон яратилиши режалаштирилган.
Аввалроқ Тошкентда 300 та чорраҳа йил охиригача рақамли тизимга ўтказилиши хабар қилинганди. Шунингдек, Тошкентдаги чорраҳаларнинг барчасига махсус автоматлаштирилган камералар ўрнатилиши ҳақида хабар берилди.
