Oʻzbekistonning davlat byudjeti daromadlari 2021 yili 164,7 trillion soʻmni tashkil etib, 2020 yilga nisbatan 31,7 trillion soʻmga (+23,9 foiz) koʻp boʻldi. Bu haqda Moliya vazirligi xabar berdi.
Maʼlum qilinishicha, davlat byudjeti va davlat maqsadli jamgʻarmalari daromadlari 2021 yilda 196,4 trillion soʻmni (yalpi ichki mahsulotga nisbatan 26,7 foiz) tashkil etgan.
Shuningdek, soliq organlari maʼmuriyatchiligidagi tushumlar 2021 yilda 127,9 trillion soʻmni tashkil etdi. 2020 yil bilan solishtirganda ular 24,3 trillion soʻmga (+23,5 foiz) oshdi. Xususan, Yirik soliq toʻlovchilar boʻyicha hududlararo davlat soliq inspeksiyasi boʻyicha tushumlar 82,3 trillion soʻmni tashkil etdi (2020 yil bilan solishtirganda oʻsish — 14,6 trillion soʻm).
Bundan tashqari, bojxona organlari maʼmuriyatchiligidagi tushumlar 2021 yilda 8,5 trillion soʻmga (+34,5 foiz) oshib, 33,2 trillion soʻmni tashkil etdi.
Avvalroq Byudjet xarajatlari samaradorligini oshirish maqsadida yangi inspeksiya tashkil etilishi xabar qilingandi. Shuningdek, Oʻzbekistonda byudjet taqchilligini YAIMga nisbatan 3 foizdan oshirmaslik reja qilingani haqida xabar berildi.
