Oʻzbekiston va Rossiya turizm sohasida hamkorlikni mustahkamlaydi. Bu haqda Rossiya hukumati matbuot xizmati xabar berdi.
Maʼlum qilinishicha, Rossiya bosh vaziri oʻrinbosari Dmitriy Chernishenko va Oʻzbekiston bosh vazir oʻrinbosari — turizm va madaniy meros vaziri Aziz Abduhakimov Rossiya va Oʻzbekiston oʻrtasida sayyohlar oqimini oshirish uchun shart-sharoitlar yaratish boʻyicha chora-tadbirlar rejasini imzolagan.
“Ishonchim komilki, turizm aloqalarini mustahkamlash boʻyicha qoʻshma ishlar yangi yoʻnalishlarni ochib, davlatlarimiz fuqarolarining arzon va maʼrifiy dam olishi uchun sharoit yaratadi”, — dedi Dmitriy Chernishenko.
Qayd etilishicha, qoʻshma reja 20 ta tadbirni oʻz ichiga oladi. Xususan, Rossiya va Oʻzbekistonda Turizm yili oʻtkaziladi. Shuningdek, “Buyuk ipak yoʻli” transchegaraviy sayyohlik marshruti ishga tushiriladi.
Bundan tashqari, mamlakatlar oʻrtasida festival, gastronomik, vino, ekstremal, qishki va boshqa turizm turlari uchun maxsus turpaketlar yaratiladi. Shu bilan birga, Rossiya va Oʻzbekiston talabalari uchun oʻquv sayohatlari tashkil etiladi.
Taʼkidlanishicha, hukumatlararo komissiya doirasida turizm sohasida hamkorlik boʻyicha alohida Rossiya-Oʻzbekiston quyi qoʻmitasi tashkil etiladi.
Avvalroq Prezident Samarqandda 381 million dollarlik turizm markazi qurilishi bilan tanishgani xabar qilingandi. Shuningdek, turizm sohasida xizmat koʻrsatishga oid davlat standartlariga oʻzgartirish kiritilgani haqida xabar berildi.
