Rossiya Prezidenti matbuot kotibi Dmitriy Peskov AQSH amalda Rossiya bilan iqtisodiy urush olib borayotganini maʼlum qildi. Bu haqda “Kommersantʼ” xabar berdi.
Maʼlum qilinishicha, Peskovdan Davlat kotibi oʻrinbosari Viktoriya Nulandning AQSH Vladimir Putinning “strategik magʻlubiyati”ni oʻz maqsadi sifatida koʻrayotgani haqidagi bayonotiga izoh berish soʻralgan. Buni Rossiyaga iqtisodiy urush eʼlon qilish deb hisoblash mumkinmi, degan savolga Kreml vakili ijobiy javob bergan.
“AQSH, shubhasiz, Rossiyaga iqtisodiy urush eʼlon qildi va ular bu urushni olib bormoqda. Ha, de-fakto shunday”, — dedi Peskov.
Peskov, shuningdek, Gʻarb davlatlari sanksiyalarni kengaytirishda davom etayotganini hisobga olib, bu urushda yutqazmaslik uchun Rossiyada qanday imkoniyatlar borligi haqidagi savolga javob berdi.
“Rossiya AQSH sanksiyalariga javoban oʻz manfaatlariga mos keladigan choralarni koʻradi”, — dedi Peskov.
Avvalroq Rossiyada dollar va yevro kurslari tarixiy maksimumni yangilagani xabar qilingandi. Shuningdek, AQSH senatorlari Rossiya zaxiralaridagi oltin bilan operatsiyalarni taqiqlashni taklif qilgani haqida xabar berildi.
