Британиянинг Rolls-Royce компанияси Россияга автомобиль етказиб беришни тўхтатди. Бу ҳақда бренднинг мамлакатдаги расмий вакили Forbes’га маълум қилди.
Германиянинг BMW AG автомобиль ишлаб чиқарувчиси таркибига кирувчи Британиянинг Rolls-Royce компанияси Россияга люкс автомобиллар етказиб беришни тўхтатди.
«Минтақада вазият ноаниқлигича қолмоқда. Ҳозирги шароитда биз Россия бозорига автомобиль етказиб беришни тўхтатмоқдамиз. Биз вазиятни, шунингдек, бизнесимиз учун юзага келиши мумкин бўлган оқибатларни баҳолашда давом этамиз», — деди расмийлар Forbes’га.
Уларнинг таъкидлашича, компания Украинадаги воқеаларни катта ташвиш билан кузатиб бормоқда.
«Биз вазиятни халқаро ҳуқуққа мувофиқ, тез ва тинч йўл билан ҳал қилишга чақирамиз. Биз тегишли санкцияларни диққат билан кузатмоқдамиз ва баҳолаймиз», — деди Rolls-Royce вакиллари.
Аввалроқ Mercedes-Benz Россияга автомобиль етказиб беришни тўхтатиши хабар қилинганди. Шунингдек, Jaguar ва Land Rover Россияга автомобиль етказиб беришни тўхтатгани ҳақида хабар берилди.
