Polsha oʻz havo hududini Rossiya aviakompaniyalari uchun yopadi. Bu haqda mamlakat hukumati matbuot kotibi Petr Myuller maʼlum qildi.
Unga koʻra, taqiq 26 fevral yarim tundan boshlab kuchga kiradi. Polsha bosh vaziri Mateush Moraveskiy Vazirlar Kengashiga Rossiya uchun havo hududining yopilishiga olib keladigan qarorini tayyorlashni buyurgan.
Bundan tashqari, Chexiya hukumati ham Rossiyaning ayrim aviakompaniyalari uchun havo hududidan foydalanishga cheklovlar tayyorlamoqda, deya xabar berdi Chexiyaning DenikN nashri bosh vazir Petr Fialaga tayanib.
“Ammo biz bu cheklovni boshqa hech bir davlat qoʻllamasa ham, kiritishga tayyormiz”, — dedi Fiala.
Uning soʻzlariga koʻra, Chexiya va Polsha transport vazirlari yaqin aloqada boʻlib, birgalikda cheklovlar joriy qilmoqchi.
Avvalroq Chexiya rossiyaliklarga yangi vizalar va yashash uchun ruxsatnomalar berishni toʻxtatganini eʼlon qilgandi.
