Россияда мавжуд йирик бизнес эгалари ва бош директорлар Украинадаги ҳарбий амалиётлар фонида Президент Владимир Путин билан учрашиш учун Кремлга чақирилди. Бу ҳақда Россия оммавий ахборот воситалари ёзмоқда.
Қайд этилишича, деярли барча йирик бизнес вакилларини ўз ичига олган Россия саноатчилар ва тадбиркорлар иттифоқи потенциал учрашув ҳақида изоҳ бермаган.
Маълум бўлишича, РБК Президент матбуот котиби Дмитрий Песковга сўров юборган. Нашр суҳбатдошларига кўра, учрашув 24 февраль куни Москва вақти билан тахминан 16:00да бўлиб ўтади.
Манбалардан бирининг сўзларига кўра, ишбилармонлар билан учрашув кеча эълон қилинган. Таклиф қилинганларнинг катта қисмини «саноатчилар» ташкил қилади.
«Учрашув, катта эҳтимол билан, ҳатто федерал телеканалларда ҳам намойиш этилади», — дея қўшимча қилган нашр манбаси.
Маълумот учун, 24 февраль куни эрта тонгда Россия Президенти Владимир Путин Донбассда махсус ҳарбий операция ўтказилишини эълон қилди.
Унинг сўзларига кўра, операциядан мақсад «Киев режими томонидан безорилик, геноцидга учраган» одамларни ҳимоя қилишдир.
