Osiyo taraqqiyot banki 22 fevral kuni Oʻzbekistondagi mintaqaviy aloqalar uchun muhim boʻlgan milliy avtomobil yoʻllarini rekonstruksiya va modernizatsiya qilish uchun 273,85 million dollar miqdorida kredit ajratishni maʼqulladi. Bu haqda bank saytida xabar berilgan.
“Dengizga chiqish imkoniga ega boʻlmagan davlat sifatida qoʻshni mamlakatlar bilan savdo va transportni osonlashtiradigan ishonchli yoʻl tarmoqlari Oʻzbekistonning iqtisodiy oʻsishida muhim ahamiyatga ega”, — deydi OTBning Markaziy va Gʻarbiy Osiyo boʻyicha Bosh direktori Yevgeniy Jukov.
Uning taʼkidlashicha, OTB hukumatning milliy avtomobil yoʻllarining xavfsizligi va iqlimga chidamliligini yaxshilash, bu boʻyicha saʼy-harakatlarini qoʻllab-quvvatlashga intilmoqda, chunki bu Oʻzbekistonning mintaqaviy transport va logistika markazi sifatidagi salohiyatini roʻyobga chiqarishga yordam beradi.
Qayd etilishicha, Oʻzbekistonning mavjud yoʻl tarmoqlari mavjud quvvat va ulanish talablariga javob bersa-da, ular yomon holatda hamda qayta tiklanishga muhtoj. Mamlakatda har 100 ming kishiga har yili 11,2 ta oʻlim toʻgʻri keladi, bu transport vositalariga egalik darajasi past boʻlgan mamlakat uchun xalqaro standartlar boʻyicha yuqoridir.
OTB loyihasi Surxondaryo viloyatidagi Darband va Denov oʻrtasidagi respublika yoʻlining qariyb 106 kilometrini yangilashga va Gʻuzor-Buxoro-Nukus-Beyneu (A380) avtomobil yoʻlining qariyb 87 kilometrini rekonstruksiya qilishga yordam beradi.
OTB shuningdek, loyiha amalga oshirilayotgan joylarda tadbirkor ayollarni qoʻllab-quvvatlash uchun grant sifatida 150 ming dollar ajratadi. Ularga moliyaviy savodxonlik, marketing va tadbirkorlik yoʻnalishlari oʻrgatiladi.
