Rossiyada Donesk va Luganskdan kelgan qochqinlarning har biriga 10 ming rubldan toʻlovlar berila boshlandi. Bu haqda Rossiya favqulodda vaziyatlar vaziri vazifasini bajaruvchi Aleksandr Chupriyan maʼlum qildi.
Uning qayd etishicha, Rostov viloyati hukumatdan har bir qochqinga 10 ming rubldan toʻlash uchun 5 milliard rubl olgan.
“Biz allaqachon bu mablagʻlarni oʻzlashtirishni boshladik. Ishni shunday tashkil qilamizki, yaqin orada kelgan odamlar bu pulni olishlari mumkin boʻladi”, — dedi u jurnalistlarga.
Maʼlumot uchun, 18 fevral kuni Lugansk va Donesk rahbarlari Leonid Pasechnik va Denis Pushilin harbiy harakatlar xavfi kuchayishi munosabati bilan hududlar aholisi Rossiya hududiga, xususan Rostov viloyatiga evakuatsiya qilinishi haqida xabar berdi.
Rossiya Prezidenti Vladimir Putin mamlakat hududiga kelgan qochqinlarning har biriga 10 ming rubldan toʻlash boʻyicha topshiriq berdi.
