Xitoyning Chjeszyan provinsiyasidagi kollej bitiruvchilari oʻz bizneslarini boshlash uchun 500 ming yuan (78,9 ming dollar)gacha qarz olishlari mumkin boʻladi. Bu haqda Reuters xabar berdi.
Qayd etilishicha, agar bitiruvchi talabaning tijorati muvaffaqiyatsizlikka yuz tutsa, hukumat kreditning 80 foizini qaytarishga yordam beradi.
Xabarga koʻra, Xitoyning yuqori iqtisodiy rejalashtiruvchisi tomonidan tayyorlangan ushbu tadbir loyihasi hukumat iqtisodiy oʻsishning sekinlashishi fonida millionlab bitiruvchilarni ish bilan taʼminlash istiqbolidan tashvishlanayotganidan dalolat beradi.
Sohildagi ishlab chiqarish markazi boʻlgan Chjeszyan provinsiyasiga 2025 yilgacha daromadlar tengsizligini kamaytirish boʻyicha tajriba siyosatini amalga oshirish vazifasi yuklangan.
Kredit summasi 100 ming yuan (15,7 ming dollar)dan oshmagan taqdirda bitiruvchilarning biznesi muvaffaqiyatsizlikka uchrasa, hukumat kreditning 80 foizini yoki hatto 100 foizini qoplaydi.
Bundan tashqari, agar bitiruvchilar ishlash uchun Chjeszyanda qolsa, yashash uchun nafaqa va 20 mingdan 400 ming yuangacha boʻlgan uy-joy subsidiyalarini olishi mumkin boʻladi.
Bunga qadar Davlat taraqqiyot va islohotlar qoʻmitasi hukumat bu yil mamlakat boʻylab rekord darajadagi 10,7 millionga yetishi taxmin qilinayotgan bitiruvchilarni ishga oladigan kichik kompaniyalar uchun imtiyozlar ishlab chiqishini aytgandi.
