Лондоннинг ICE биржасида 2022 йил апрель ойида етказиб бериладиган Brent маркали нефть нархи бир баррель учун 95 доллардан ошди. Охирги марта Brent нефти 2014 йил октябрь ойида бир баррель учун 95 доллардан ошган эди.
12 февраль ҳолатига кўра, Brent нархи 3,79 фоизга ошиб, бир баррель учун 95,1 долларни ташкил қилган.
Таъминот учун хавф омиллари — Шарқий Европа ва Яқин Шарқдаги геосиёсий кескинлик нарх кўтарилишига таъсир қилмоқда. ОПEК+нинг сўнгги йиғилишида ташкилот нефть қазиб олишни кунига 400 минг баррелга оширишга келишиб олганди, бу эса нефть нархининг тушишига олиб келиши мумкин.
Аввалроқ Brent фючерслари етти йиллик энг юқори кўрсаткични янгилаб, бир баррель учун 93 доллардан ошгани хабар қилинганди.
