Oʻzbekistonda boquvchisini yoʻqotganlik nafaqasini olish yoshi uzaytirildi. Prezident tomonidan “Fuqarolarning va tadbirkorlik subyektlarining huquqlari kafolatlari yanada kuchaytirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi qonun imzolandi.
Unga koʻra, oʻquvchilar va talabalar oʻqishi davomida 23 yoshgacha boquvchisini yoʻqotganlik nafaqasini olishi mumkinligi belgilandi. Ilgari bu koʻrsatkich 18 yoshgacha edi.
Bolani parvarishlash taʼtilining ish stajiga qoʻshiladigan davri 6 yil etib belgilandi. Ilgari jami 3 yildan koʻp boʻlmagan davr kiritilgan.
Kiritilgan qoʻshimchalarga muvofiq, nogironlik pensiyalari Chernobil AESdagi avariya oqibatida III guruh nogironi boʻlgan shaxslarga ham toʻlanadi. Ilgari faqat I va II guruh nogironlariga toʻlanishi belgilangan.
Oilaning mehnatga qobiliyatsiz aʼzolari (bolalar, aka-ukalar, opa-singillar va nabiralar) yoshi 18 yoshgacha etib belgilandi. Ilgari 16 yoshgacha edi.
Avvalroq Oʻzbekistonda ijtimoiy nafaqa oluvchi oʻzgalar parvarishiga muhtoj yolgʻiz shaxslarga kompensatsiya toʻlovi joriy etilishi haqida xabar berilgandi.
